Библия на церковно-славянском языке - транслитерация современным русским алфавитом
(1751)

Первая книга Моисеева Бытие

◄◄ | ◄ | Глава ⚫ | ► | ►►

¹ Приложив же Авраам, поя жену, ейже имя Хеттура:

² роди же ему Зомврана и Иезана, и Мадала и Мадиама, и Иесвока и Соиена.

³ Иезан же роди Савана и Фамана и Дедана. Сынове же Дедани быша: Рагуил и Навдеил, и Асуриим и Латусиим и Лаомим.

⁴ Сынове же Мадиамли: Ефар и афир, и Енох и Авида и Елдага. Вси сии быша сынове Хеттурины.

⁵ Даде же Авраам вся своя имения Исааку сыну своему:

⁶ сыном же наложниц своих даде Авраам дары и отпусти я от Исаака сына своего, еще жив сый, к востоку на землю восточную.

⁷ Сия же лета дний жития Авраамля, елика поживе, лет сто седмьдесят пять:

⁸ и ослабев умре Авраам в старости добрей, старец исполнен дний, и приложися к людем своим.

⁹ И погребоша его Исаак и Исмаил два сынове его в пещере Сугубей, на селе Ефронове сына Саарова Хеттеанина, еже есть прямо Мамврии,

¹⁰ на селе и в пещере, юже притяжа Авраам от сынов Хеттеовых: тамо погребоша Авраама и Сарру жену его.

¹¹ Бысть же по умертвии Авраамли, благослови Бог Исаака сына его: и вселися Исаак у кладязя Видения.

¹² Сия же бытия Исмаила сына Авраамля, егоже роди Агарь Египтяныня, раба Саррина, Аврааму:

¹³ и сия имена сынов Исмаилих, по именом родов его: первенец Исмаилов Наваиоф, и Кидар и Навдеил, и Массам

¹⁴ и Масма, и Дума и Масси,

¹⁵ и Ходдан и Феман, и Иетур и Нафес и Кедма.

¹⁶ Сии суть сынове Исмаили: и сия имена их в скиниях их и в селех их: дванадесять князи в языцех их.

¹⁷ И сия лета жития Исмаилова, сто тридесять седмь лет: и ослабев умре, и приложися к роду своему.

¹⁸ Вселися же от Евилата даже до Сура, иже есть в лице Египту, даже доити ко Ассириом: пред лицем всех братий своих вселися.

¹⁹ И сия бытия Исаака сына Авраамля: Авраам роди Исаака.

²⁰ Бяше же Исаак лет четыредесяти, егда поя Ревекку дщерь Вафуила Сирина от Месопотамии Сирския, сестру Лавана Сирина, себе в жену.

²¹ Моляшеся же Исаак Господеви о Ревекце жене своей, яко неплоды бяше: послуша же его Бог, и зачат во утробе Ревекка жена его.

²² Играста же младенца в ней, и рече: аще тако ми хощет быти, почто ми сие? И иде вопрошати Господа.

²³ И рече ей Господь: два языка во утробе твоей суть, и двои людие от утробы твоея разлучатся: и людие людий превзыдут, и болший поработает меншему.

²⁴ И исполнишася дние родити ей, и бяху сей близнята во утробе ея:

²⁵ изыде же сын первенец чермен, весь, яко кожа, космат: и нарече имя ему Исав:

²⁶ и посем изыде брат его, рука же его придержася пяте Исавове: и нарече имя ему Иаков. Исааку же бе шестьдесят лет, егда роди их Ревекка.

²⁷ Возрастоша же юноши: и бысть Исав человек ведый ловити, селный: Иаков же бысть человек нелукав, живый в дому.

²⁸ И возлюби Исаак Исава, яко ловитва его бяше брашно ему: Ревекка же любляше Иакова.

²⁹ Свари же Иаков варение: и прииде Исав с поля изнемог,

³⁰ и рече Исав Иакову: напитай мя варением сочива сего, яко изнемогаю. Сего ради прозвася имя ему Едом.

³¹ И рече Иаков Исаву: отдаждь ми днесь первенство свое.

³² Рече же Исав: се, аз иду умрети, и вскую ми первенство сие?

³³ И рече Иаков ему: кленися ми днесь. И кляся ему, и отдаде Исав Иакову первенство свое.

³⁴ Иаков же даде Исаву хлеб и варение сочевно: яде же и пи, и востав отиде: и нивочтоже вмени себе Исав первенство.