Библия на церковно-славянском языке - транслитерация современным русским алфавитом
(1751)

Послание апостола Павла Римлянам

◄◄ | ◄ | Глава ⚫ | ► | ►►

¹ Павел, раб Иисус Христов, зван Апостол, избран в благовестие Божие,

² еже прежде обеща пророки Своими в писаниих святых,

³ о Сыне Своем, бывшем от семене Давидова по плоти,

⁴ нареченнем Сыне Божии в силе, по духу святыни, из воскресения от мертвых, Иисуса Христа Господа нашего,

⁵ Имже прияхом благодать и апостольство в послушание веры во всех языцех, о имени Его.

⁶ В нихже есте и вы, звани Иисусу Христу.

⁷ Всем сущым в Риме возлюбленным Богу, званным святым. Благодать вам и мир от Бога Отца нашего, и Господа Иисуса Христа.

⁸ Первое убо благодарю Бога моего Иисусом Христом о всех вас, яко вера ваша возвещается во всем мире.

⁹ Свидетель бо ми есть Бог, Емуже служу духом моим во благовествовании Сына Его, яко безпрестани память о вас творю,

¹⁰ всегда в молитвах моих моляся, аще убо когда поспешен буду волею Божиею приити к вам.

¹¹ Желаю бо видети вас, да некое подам вам дарование духовное, ко утверждению вашему.

¹² Сие же есть, соутешитися в вас верою общею, вашею же и моею.

¹³ Не хощу же не ведети вам, братие, яко множицею восхотех приити к вам, и возбранен бых доселе, да некии плод имею и в вас, якоже и в прочих языцех.

¹⁴ Еллином же и варваром, мудрым же и неразумным должен есмь.

¹⁵ Тако есть, еже по моему усердию и вам сущым в Риме благовестити.

¹⁶ Не стыжуся бо благовествованием Христовым: сила бо Божия есть во спасение всякому верующему, Иудеови же прежде и Еллину.

¹⁷ Правда бо Божия в нем является от веры в веру, якоже есть писано. Праведныи же от веры жив будет.

¹⁸ Открывается бо гнев Божии с небесе на всякое нечестие и неправду человеков, содержащих истину в неправде.

¹⁹ Зане разумное Божие яве есть в них, Бог бо явил есть им:

²⁰ невидимая бо Его, от создания мира твореньми помышляема, видима суть, и присносущная сила Его и Божество, во еже быти им безответным.

²¹ Занеже разумевше Бога, не яко Бога прославиша или благодариша, но осуетишася помышлении своими, и омрачися неразумное их сердце.

²² Глаголющеся быти мудри, объюродеша,

²³ и измениша славу нетленнаго Бога в подобие образа тленна человека и птиц и четвероног и гад.

²⁴ Темже и предаде их Бог в похотех сердец их в нечистоту, во еже сквернитися телесем их в себе самех.

²⁵ Иже премениша истину Божию во лжу, и почтоша и послужиша твари паче Творца, Иже есть благословен во веки, аминь.

²⁶ Сего ради предаде их Бог в страсти безчестия. И жены бо их измениша естественную подобу в презестественную.

²⁷ Такожде и мужи, оставльше естественную подобу женска пола, разжегошася похотию своею друг на друга, мужи на мужех студ содевающе, и возмездие, еже подобаше прелести их, в себе восприемлюще.

²⁸ И якоже не искусиша имети Бога в разуме, (сего ради) предаде их Бог в неискусен ум, творити неподобная,

²⁹ исполненых всякия неправды, блужения, лукавства, лихоимания, злобы. Исполненых зависти, убииства, рвения, льсти, злонравия.

³⁰ Шепотники, клеветники, богомерзки, досадители, величавы, горды, обретатели злых, родителем непокоривы,

³¹ неразумны, непримирителны, нелюбовны, неклятвохранительны, немилостивны.

³² Нецыи же и оправдание Божие разумевше, яко таковая творящии достойни смерти суть, не точию сами творят, но и соизволяют творящым.