Библия на церковно-славянском языке - транслитерация современным русским алфавитом
(1751)

Третье послание Иоанна

◄◄ | ◄ | Глава ⚫ | ► | ►►

¹ Старец Гаиеви возлюбленному, егоже аз люблю воистинну.

² Возлюбленне, во всех молюся (о тебе) благоспеятися тебе и здравствовати, якоже благоспеется тебе душа.

³ Возрадовахся зело, пришедшым братиям и свидетельствующым твою истину, якоже ты во истине ходиши.

⁴ Болши сея не имам радости, да слышу моя чада во истине ходяща.

⁵ Возлюбленне, верно твориши, еже аще делаеши в братию и в странныя,

⁶ иже свидетельствоваша о твоей любви пред церковию. Ихже предпослав достойно Богу, добре твориши.

⁷ О имени бо Его изыдоша, ничтоже приемлюще от язык.

⁸ Мы убо должни есмы приимати таковых, да поспешницы будем истине.

⁹ Писах церкви: но первенстволюбец их Диотреф не приемлет нас.

¹⁰ Сего ради, аще прииду, воспомяну его дела, яже творит, словесы лукавыми укоряя нас: и недоволен бывая о сих, ни сам приемлет братию, и хотящым возбраняет, и от церкве изгонит.

¹¹ Возлюбленне, не уподобляися злому, но благому. Благотворяй от Бога есть: а злотворяй не виде Бога.

¹² Димитриеви свидетельствовася от всех и от самыя истины: и мы же свидетельствуем, и весте, яко свидетельство наше истинно есть.

¹³ Многа имех писати, но не хощу чернилом и тростию писати тебе,

¹⁴ уповаю же абие видети тя и усты ко устом глаголати.

¹⁵ Мир тебе. Целуют тя друзи: целуй други по имени. Аминь.