Библия на церковно-славянском языке - транслитерация современным русским алфавитом
(1751)

Первое послание апостола Павла Коринфянам

◄◄ | ◄ | Глава ⚫ | ► | ►►

¹ Павел, зван Апостол Иисус Христов волею Божиею, и Сосфен брат,

² церкви Божией сущей в Коринфе, освященным о Христе Иисусе, званным святым, со всеми призывающими имя Господа нашего Иисуса Христа, во всяцем месте, тех же и нашем:

³ благодать вам и мир от Бога Отца нашего и Господа Иисуса Христа.

⁴ Благодарю Бога моего всегда о вас, о благодати Божией данней вам о Христе Иисусе,

⁵ яко во всем обогатистеся о Нем, во всяцем слове и всяцем разуме,

⁶ якоже свидетелство Христово известися в вас:

⁷ яко вам не лишитися ни во единем даровании, чающым откровения Господа нашего Иисуса Христа,

⁸ Иже и утвердит вас даже до конца неповинных в день Господа нашего Иисуса Христа.

⁹ Верен Бог, Имже звани бысте во общение Сына Его Иисуса Христа, Господа нашего.

¹⁰ Молю же вы, братие, именем Господа нашего Иисуса Христа, да тожде глаголете вси, и да не будут в вас распри, да будете же утверждени в томже разумении и в тойже мысли.

¹¹ Возвестися бо ми о вас, братие моя, (посланным) от Хлоиса, яко рвения в вас суть.

¹² Глаголю же се, яко кийждо вас глаголет: аз убо есмь Павлов, аз же Аполлосов, аз же Кифин, аз же Христов.

¹³ Еда разделися Христос, еда Павел распятся по вас? Или во имя Павлово крестистеся?

¹⁴ Благодарю Бога, яко ни единаго от вас крестих, точию Криспа и Гаиа,

¹⁵ да не кто речет, яко в мое имя крестих.

¹⁶ Крестих же и Стефанинов дом: прочее не вем, аще кого иного крестих.

¹⁷ Не посла бо мене Христос крестити, но благовестити, не в премудрости слова, да не испразднится крест Христов.

¹⁸ Слово бо крестное погибающым убо юродство есть, а спасаемым нам сила Божия есть.

¹⁹ Писано бо есть: погублю премудрость премудрых, и разум разумных отвергу.

²⁰ Где премудр? Где книжник? Где совопросник века сего? Не обуи ли Бог премудрость мира сего?

²¹ Понеже бо в премудрости Божией не разуме мир премудростию Бога, благоизволил Бог буйстовм проповеди спасти верующих.

²² Понеже и Иудее знамения просят, и Еллини премудрости ищут:

²³ мы же проповедуем Христа распята, Иудеем убо соблазн, Еллином же безумие,

²⁴ самем же званным Иудеем же и Еллином Христа, Божию силу и Божию премудрость:

²⁵ зане буее Божие премудрее человек есть, и немощное Божие крепчае человек есть.

²⁶ Видите бо звание ваше, братие, яко не мнози премудри по плоти, не мнози сильни, не мнози благородни:

²⁷ но буяя мира избра Бог, да премудрыя посрамит, и немощная мира избра Бог, да посрамит крепкая:

²⁸ и худородная мира и уничиженная избра Бог, и не сущая, да сущая упразднит,

²⁹ яко да не похвалится всяка плоть пред Богом.

³⁰ Из Негоже вы есте о Христе Иисусе, Иже бысть нам премудрость от Бога, правда же и освящение и избавление,

³¹ да, якоже пишется: хваляйся, о Господе да хвалится.