Библия на церковно-славянском языке - транслитерация современным русским алфавитом
(1751)

Вторая книга Ездры

◄◄ | ◄ | Глава ⚫ | ► | ►►

¹ И сотвори Иосиа пасху во Иерусалиме Господу своему, и пожре пасху четвертагонадесять дне перваго месяца,

² поставляя священники по чредам в ризы одеянны в церкви Господни:

³ и рече левитом священнослужителем Израилевым, да освятят себе Господеви на поставление святаго кивота Господня в дому, егоже созда Соломон сын Давидов царь:

⁴ не будет вам взяти его на раменах и ныне служите Господу Богу вашему и пецытеся о языцех Его Израили, и уготовайтеся по отечеством и племеном вашым по писанию Давида царя Израилева и по величеству Соломона сына его:

⁵ и станите в церкви по участию началства отеческаго вашего левитскаго, иже пред братиею вашею сынми Израилевыми,

⁶ по чину пожрите пасху, и жертвы уготовайте братиям вашым, и сотворите пасху по заповеди Господни данней Моисею.

⁷ И даде Иосиа людем обретшымся (тамо) агнцев и овнов тридесять тысящ, телцев три тысящы: сия от царских дана суть по обещанию людем и священником и левитом..

⁸ И даде Хелкиа и Захариа и Сиил приставницы святилища жерцем на пасху овец две тысящы шесть сот, телцев триста.

⁹ И Иехониа, и Самеа, и Нафанаил брат, и Асавиа, и Охиил, и Иорам тысященачалницы даша левитом на пасху овец пять тысящ, телцев седмь сот.

¹⁰ И сим бывшым, благолепно сташа священницы и левити, имеюще опресноки, по племеном

¹¹ и по частеначалством отцев, пред людьми приносити Господу по писанным в книзе Моисеове, и тако во утрие.

¹² И испекоша пасху огнем, якоже подобаше, и жертвы свариша в сосудех медяных и в конобех со благовонием, и принесоша всем, иже от народа.

¹³ И по сих уготоваша себе и священником братиям своим сыновом Аароним.

¹⁴ Иерее бо возношаху тучная до конца часа, а левити уготоваша себе и жерцем братии своей, сыном Аароним.

¹⁵ Священнопевцы же сынове Асафовы бяху в чину своем по заповеди Давидове: и Асаф, и Захариа, и Еддинус иже бяше от царя.

¹⁶ И вратари при киихждо дверех: да не преступает кийждо своея чреды, братия бо их левити уготоваша им.

¹⁷ И совершишася жертвы Господни в той день сотворити пасху

¹⁸ и принести жертвы на жертвенник Божий по повелению царя Иосии.

¹⁹ И обретшиися во время то пасху и праздник опресночный дний седмь.

²⁰ И не принесеся пасха такова во Израили от времене Самуила пророка,

²¹ и вси царие Израилевы не праздноваша таковыя пасхи, какову сотвори Иосиа, и священницы и левити, и Иудее и весь израиль обретшийся во обитании своем во Иерусалиме.

²² Во осмоенадесять лето царствующу Иосии празднована бысть пасха сия.

²³ И управлена быша дела Иосиева пред Господем его сердцем полным благочестия:

²⁴ и яже о нем, писана суть в прежних временех, о согрешивших и нечествовавших противу Господа паче всякаго языка и царства и имиже оскорбиша Его в разуме: и словеса Господня восташа на Израиля.

²⁵ И по всему деянию сему Иосиину, случися фараону царю Египетскому идущу брань воздвигнути в Харкамисе при Евфрате: и изыде сопротиву ему Иосиа.

²⁶ И посла царь Египетский к нему, глаголя: что мне и тебе есть, царю Иудин?

²⁷ Несмь на тя послан от Господа Бога, на Евфрат бо брань моя есть: и ныне Господь со мною есть, и Господь поспешаяй ми есть, отступи от мене и не сопротивляйся Господеви.

²⁸ И не возвратися Иосиа на колесницу свою, но ратовати его усиловашеся, не внемля словесем Иеремии пророка от уст Господних:

²⁹ но постави противу его брань на поли Магеддонстем. И снидоша началницы ко царю Иосии.

³⁰ И рече царь отроком своим: изведите мя от брани, изнемогох бо зело. И абие изведоша его отроцы его из ополчения.

³¹ И взыде на колесницу вторую свою, и пришед во Иерусалим жизнь свою премени, и погребен во отчем гробе.

³² И во всей Иудеи плакаша о Иосии: и рыдаше Иеремиа пророк о Иосии, и председящии со женами плакаху его даже до сего дне. И издадеся сие быти всегда на весь род Израилев.

³³ Сия же вписана суть в книзе повестей о царех Иудиных, и коеждо сотвореное деяния Иосиина, и славы его, и разума его в законе Господни: яже прежде сотвореная от него, и яже ныне, писана суть в книзе царей Израилевых и Иудиных.

³⁴ И вземше сущии от языка Иоахаза сына Иосиина, поставиша царем вместо Иосии отца его, суша двадесяти триех лет.

³⁵ И царствова над Иудою и над Иерусалимом месяцы три: и отстави его царь Египетский, да не царствует во Иерусалиме.

³⁶ И наложи на народ (Иудин) сребра талант сто и злата един талант.

³⁷ И постави царь Египетский Иоакима брата его царем Иудеи и Иерусалиму.

³⁸ И связа Иоаким вельможы, Заракина же брата своего емь изведе из Египта.

³⁹ Лет же бяше двадесяти пяти Иоаким, егда царствовати нача в земли Иудине и Иерусалиме: и сотвори лукавое пред Господем.

⁴⁰ На негоже изыде Навуходоносор царь Вавилонский, и связа его медяными узами, и приведе в Вавилон:

⁴¹ и священныя сосуды Господни взем Навуходоносор и принес положи в Вавилоне во храме своем.

⁴² А яже о нем глаголанная, и о нечистоте его и о злочестии, писана суть в книзе времен царских.

⁴³ И воцарися Иоаким сын его вместо его: егда же поставлен бысть, бяше лет осминадесяти:

⁴⁴ царствова же месяцы три и дний десять во Иерусалиме, и сотвори лукавое пред Господем.

⁴⁵ И по лете послав Навуходоносор, пресели его в Вавилон вкупе со священными сосуды Господними,

⁴⁶ и постави Седекию царя Иудеи и Иерусалиму, суща лет двадесяти единаго: царствова же лет единонадесять,

⁴⁷ и сотвори лукавое пред Господем и не устыдеся от словес реченных Иеремиею пророком от уст Господних.

⁴⁸ И заклят бысть от царя Навуходоносора именем Господним, и клявся отступи, и ожесточив свою выю и сердце свое, преступи законная Господа Бога Израилева.

⁴⁹ И князие людий и священников многая беззакония сотвориша, и преступиша паче всех нечистот всех языков, и оскверниша дом Господень освященный во Иерусалиме.

⁵⁰ И посла Бог отец их чрез ангела Своего призвати их, яко щадяше и и жилище Свое:

⁵¹ тии же поругашася посланным Его: и в оньже день глагола Господь, бяху ругающеся пророком Его,

⁵² дондеже прогневан Той на язык Свой за злочестия, повеле изыти на них царем Халдейским:

⁵³ тии убиша юнош их мечем окрест святаго дому их: и не пощадеша юноши и девы, и старца и младенца,

⁵⁴ но всех предаде в руки их: и вся священныя сосуды Господни малыя и великия, и сосуды кивота Господня, и царския ковчеги вземше принесоша в Вавилон:

⁵⁵ и сожгоша дом Господень, и разориша стены Иерусалима, и столпы его сожгоша огнем,

⁵⁶ и скончаша вся честнейшая его в ничтоже, и оставшихся от меча отведоша и Вавилон:

⁵⁷ и беша раби ему и сыном его даже до царства Персскаго, во исполнение словес Господних от уст Иеремииных:

⁵⁸ дондеже благоизволит земля субботы своя, во все время опустения своего субботствовати будет во исполнение лет седмидесяти.