Библия на церковно-славянском языке - транслитерация современным русским алфавитом
(1751)

Книга пророка Иезекииля

◄◄ | ◄ | Глава ⚫ | ► | ►►

¹ И бысть в тридесятое лето, в четвертый месяц, в пятый день месяца, и аз бых посреде пленения при реце Ховар: и отверзошася небеса, и видех видения Божия.

² В пятый день месяца, сие лето пятое пленения царя Иоакима,

³ и бысть слово Господне ко Иезекиилю сыну Вузиеву, священнику, в земли Халдейстей при реце Ховар. И бысть на мне рука Господня,

⁴ и видех, и се, дух воздвизаяйся грядяше от севера, и облак великий в нем, и свет окрест его, и огнь блистаяйся:

⁵ и посреде его яко видение илектра посреде огня, и свет в нем: и посреде яко подобие четырех животных. И сие видение их, яко подобие человека в них:

⁶ и четыри лица единому, и четыри крила единому,

⁷ и голени их правы, и пернаты ноги их, и искры яко блистающаяся медь, и легка крила их,

⁸ и рука человеча под крилами их на четырех странах их:

⁹ и лица их, и крила их четырех держащаяся друг друга, лица же их четырех не обращахуся внегда ходити им: коеждо прямо лица своего хождаху.

¹⁰ И подобие лиц их, лице человечее и лице львово одесную четырем, и лице телчее ошуюю четырем, и лице орлее четырем:

¹¹ (и лица их) и крила их простерта свыше четырем, коемуждо два сопряжена друг ко другу, и два покрываху верху телесе их, и коеждо прямо лицу своему идяше:

¹² идеже аще бяше дух шествуяй, идяху и не обращахуся.

¹³ И посреде животных видение, яко углия огня горящаго, яко видение свещ сообращающихся посреде животных, и свет огня, и от огня исхождаше яко молния:

¹⁴ и животная течаху и обращахуся, яко видение везеково.

¹⁵ И видех, и се, коло едино на земли держащееся животных четырех:

¹⁶ и видение колес и сотворение их, яко видение Фарсиса, и подобие едино четырем: и дело их бяше, якоже аще бы было коло в колеси:

¹⁷ на четыри страны их шествоваху: не обращахуся, внегда шествовати им,

¹⁸ ниже хребты их, и высота бяше им. И видех та, и плеща их исполнена очес окрест четырем:

¹⁹ и внегда шествовати животным, шествоваху и колеса держащеся их: и внегда воздвизатися животным от земли, воздвизахуся и колеса.

²⁰ Идеже аще бяше облак, тамо бяше и дух, еже шествовати: шествоваху и животная, и колеса воздвизахуся с ними, зане дух жизни бяше в колесех.

²¹ Внегда идяху сия, идяху (и колеса), и внегда стояти им, стояху (и колеса с ними), и егда воздвизахуся от земли, воздвизахуся с ними (и колеса), яко дух жизни бяше в колесех.

²² И подобие над главою животных яко твердь, яко видение кристалла, простертое над крилами их свыше:

²³ и под твердию крила их простерта, паряще друг ко другу, комуждо два спряжена, прикрывающе телеса их.

²⁴ И слышах глас крил их, внегда паряху, яко глас вод многих, яко глас Бога Саддаи: и внегда ходити им, глас слова яко глас полка: и внегда стояти им, почиваху крила их.

²⁵ И се, глас превыше тверди сущия над главою их: внегда стояти им, низпускахуся крила их.

²⁶ И над твердию, яже над главою их, яко видение камене сапфира, подобие престола на нем, и на подобии престола подобие якоже вид человечь сверху.

²⁷ И видех яко видение илектра, яко видение огня внутрь его окрест: от видения чресл и выше и от видения чресл даже до долу видех видение огня, и свет его окрест:

²⁸ яко видение дуги, егда есть на облацех в день дождя, тако стояние света окрест.