Библия на церковно-славянском языке - транслитерация современным русским алфавитом
(1751)

Первая книга Моисеева Бытие

◄◄ | ◄ | Глава ⚫ | ► | ►►

¹ В начале сотвори Бог небо и землю.

² Земля же бе невидима и неустроена, и тма верху бездны, и Дух Божий ношашеся верху воды.

³ И рече Бог: да будет свет. И бысть свет.

⁴ И виде Бог свет, яко добро, и разлучи Бог между светом и между тмою.

⁵ И нарече Бог свет день, а тму нарече нощь. И бысть вечер, и бысть утро, день един.

⁶ И рече Бог: да будет твердь посреде воды, и да будет разлучающи посреде воды и воды. И бысть тако.

⁷ И сотвори Бог твердь, и разлучи Бог между водою, яже бе под твердию, и между водою, яже бе над твердию.

⁸ И нарече Бог твердь небо. И виде Бог, яко добро. И бысть вечер, и бысть утро, день вторый.

⁹ И рече Бог: да соберется вода, яже под небесем, в собрание едино, и да явится суша. И бысть тако. И собрася вода, яже под небесем, в собрания своя, и явися суша.

¹⁰ И нарече Бог сушу землю, и собрания вод нарече моря. И виде Бог, яко добро.

¹¹ И рече Бог: да прорастит земля былие травное, сеющее семя по роду и по подобию, и древо плодовитое творящее плод, емуже семя его в нем, по роду на земли. И бысть тако.

¹² И изнесе земля былие травное, сеющее семя по роду и по подобию, и древо плодовитое творящее плод, емуже семя его в нем, по роду на земли. И виде Бог, яко добро.

¹³ И бысть вечер, и бысть утро, день третий.

¹⁴ И рече Бог: да будут светила на тверди небесней, освещати землю и разлучати между днем и между нощию: и да будут в знамения и во времена, и во дни и в лета,

¹⁵ и да будут в просвещение на тверди небесней, яко светити по земли. И бысть тако.

¹⁶ И сотвори Бог два светила великая: светило великое в начала дне, и светило меншее в начала нощи, и звезды:

¹⁷ и положи я Бог на тверди небесней, яко светити на землю,

¹⁸ и владети днем и нощию, и разлучати между светом и между тмою. И виде Бог, яко добро.

¹⁹ И бысть вечер, и бысть утро, день четвертый.

²⁰ И рече Бог: да изведут воды гады душ живых, и птицы летающыя по земли, по тверди небесней. И бысть тако.

²¹ И сотвори Бог киты великия, и всяку душу животных гадов, яже изведоша воды по родом их, и всяку птицу пернату по роду. И виде Бог, яко добра.

²² И благослови я Бог, глаголя: раститеся и множитеся, и наполните воды, яже в морях, и птицы да умножатся на земли.

²³ И бысть вечер, и бысть утро, день пятый.

²⁴ И рече Бог: да изведет земля душу живу по роду, четвероногая и гады, и звери земли по роду. И бысть тако.

²⁵ И сотвори Бог звери земли по роду, и скоты по роду их, и вся гады земли по роду их. И виде Бог, яко добра.

²⁶ И рече Бог: сотворим человека по образу Нашему и по подобию, и да обладает рыбами морскими, и птицами небесными, (и зверми) и скотами, и всею землею, и всеми гады пресмыкающимися по земли.

²⁷ И сотвори Бог человека, по образу Божию сотвори его: мужа и жену сотвори их.

²⁸ И благослови их Бог, глаголя: раститеся и множитеся, и наполните землю, и господствуйте ею, и обладайте рыбами морскими, (и зверми) и птицами небесными, и всеми скотами, и всею землею, и всеми гадами пресмыкающимися по земли.

²⁹ И рече Бог: се, дах вам всякую траву семенную сеющую семя, еже есть верху земли всея: и всякое древо, еже имать в себе плод семене семеннаго, вам будет в снедь:

³⁰ и всем зверем земным, и всем птицам небесным, и всякому гаду пресмыкающемуся по земли, иже имать в себе душу живота, и всяку траву зелену в снедь. И бысть тако.

³¹ И виде Бог вся, елика сотвори: и се добра зело. И бысть вечер, и бысть утро, день шестый.