Библия на церковно-славянском языке - транслитерация современным русским алфавитом
(1751)

Книга Судей

◄◄ | ◄ | Глава ⚫ | ► | ►►

¹ И бысть по скончании Иисусове, и вопрошаху сынове Израилевы Господа, глаголюще: кто взыдет нам к Хананею воевода, ратовати на них?

² И рече Господь: Иуда взыдет: се, дах землю в руку его.

³ И рече Иуда к Симеону брату своему: взыди со мною в жребий мой, и ополчимся на Хананеа: и пойду и аз с тобою в жребий твой. И пойде с ним Симеон.

⁴ И взыде Иуда, и предаде Господь Хананеа и Ферезеа в руце их: и избиша их в Везеце до десяти тысящ мужей.

⁵ И обретоша Адонивезека в Везеце, и секошася с ним: и избиша Хананеа и Ферезеа.

⁶ И побеже Адонивезек: и гнаша вслед его, и яша его, и отсекоша краи рук его и краи ног его.

⁷ И рече Адонивезек: седмидесяти царем обсекох краи рук их и краи ног их, и быша собирающе (от крупиц) под трапезою моею: якоже убо сотворих, тако воздаде ми Бог. И приведоша его во Иерусалим, и умре тамо.

⁸ И воеваша сынове Иудины на Иерусалим, и взяша его, и поразиша его острием меча, и град сожгоша огнем.

⁹ И по сих снидоша сынове Иудины воевати на Хананеа живущаго в горней к югу и в равней.

¹⁰ И пойде Иуда на Хананеа живущаго в Хевроне. И изыде Хеврон со страны: имя же бе Хеврону прежде Кариафарвок-Сефер: и убиша Сесина и Ахимана и Фолмиа, роды Енаковы.

¹¹ И взыдоша оттуду к живущым в Давире: имя же Давиру бе прежде Кариафсефер, Град Писмен.

¹² И рече Халев: иже аще поразит Град Писмен и возмет его, дам ему Асхань дщерь мою в жену.

¹³ И взя его Гофониил сын Кенеза брата Халевова юнейший, и даде ему Халев Асхань дщерь свою в жену.

¹⁴ И бысть внегда отходити ей, и подвиже ю Гофониил просити у отца своего села, и ропташе (седящи) на осляти, и вопияше со осляти: на землю южную отдал мя еси. И рече ей Халев: что ти есть?

¹⁵ И рече ему Асхань: даждь ми благословение: яко на землю южную отдал еси мя, да даси мне и исходища водная. И даде ей Халев по сердцу ея исходища вышних и исходища нижних.

¹⁶ И сынове Иофора Кинеева, ужика Моисеова, взыдоша от града Финическа к сыном Иудиным в пустыню сущую на юг Иуды ко исходу Аредову, и поидоша, и вселишася с людьми.

¹⁷ И пойде Иуда с Симеоном братом своим, и изби Хананеа живущаго в Сефефе, и потребиша его: и прозваша имя граду Потребление.

¹⁸ И взя Иуда Газу и предел ея, и Аскалона и предел его, и Аккарон и предел его, и Азот и окрестная его.

¹⁹ И бяше Господь со Иудою. И взя гору, яко не возмогоша потребити живущих во юдоли, зане Рихав противоста им, и колесницы железныя бяху там.

²⁰ И даша Халеву Хеврон, якоже глагола Моисей: и наследствова тамо три грады сынов Енаковых, и изгна оттуду три сыны Енаковы.

²¹ И Иевусеа живущаго во Иерусалиме не изгнаша сынове Вениаминовы, и живяше Иевусей с сынми Вениамини во Иерусалиме даже до сего дне.

²² И взыдоша сынове Иосифли и сии в Вефиль: и Господь бяше с ними.

²³ И ополчишася, и соглядаша (сынове Иосифовы) Вефиль: имя же бе прежде граду Луза.

²⁴ И видеша стрегущии мужа исходящаго из града, и яша его и рекоша ему: покажи нам вход во град, и сотворим с тобою милость.

²⁵ И показа им вход градный: и поразиша град острием меча, мужа же и сродство его отпустиша.

²⁶ И отиде муж в землю Хеттиим, и созда тамо град, и прозва имя ему Луза: сие имя ему даже до дне сего.

²⁷ И не разори Манассий Вефсана, иже есть Скифский град, ниже дщерей его, ниже окрестных (предел) его, ниже Фанаха, ниже дщерей его, ниже живущих в Доре, ниже дщерей его, ниже живущих во Иевламе, ниже окрестных его, ниже дщерей его, и живущих в Магеддоне, ниже окрестных его и дщерей его. И нача Хананей жити на земли сей.

²⁸ И бысть егда укрепися Израиль, и сотвори Хананеа данника: изгнанием же не изгна его.

²⁹ И Ефрем не изгна Хананеа живущаго в Газере: и живяше Хананей среде его в Газере, и бысть ему в данника.

³⁰ И Завулон не изгна живущих в Хевроне и живущих во Аммане: и вселися Хананей посреде их и бысть ему данник.

³¹ И Асир не изгна живущих во Акхоре, (и бысть ему данник,) ни живущих в Доре, ни живущих в Сидоне, ни живущих в Далафе и во Ахазиве, и во Елве и во Афеке и в Роове.

³² И вселися Асир посреде Хананеа живущаго на земли (той), зане не возможе изгнати его.

³³ И Неффалим не изгна живущих в Вефсамисе, ниже живущих в Вефанахе: и вселися Неффалим среде Хананеа живущаго на земли (сей): живущии же в Вефсамисе и в Вефанахе быша ему данницы.

³⁴ И утесни Аморрей сыны Дановы в горе, яко не попусти им низходити во юдоль.

³⁵ И нача Аморрей жити в горе Чрепней, идеже медведи и лисицы, в Мирсиноне и в Салавине: и отяготе рука дому Иосифля на Аморреа, и бысть ему данник.

³⁶ И предел Аморрейский идумей от восхода Акравиня, от Камене и выше.