Библия на церковно-славянском языке - транслитерация современным русским алфавитом
(1751)

Книга пророка Аввакума

◄◄ | ◄ | Глава ⚫ | ► | ►►

¹ Видение, еже виде Аввакум пророк.

² Доколе, Господи, воззову, и не услышиши? Возопию к Тебе обидимь, и не избавиши?

³ Вскую мне показал еси труды и болезни, смотрити страсть и нечестие? Противу мне бысть суд, и судия вземлет.

⁴ Сего ради разорися закон, и не производится в совершение суд: яко нечестивый преобидит праведнаго, сего ради изыдет суд развращен.

⁵ Видите, презорливии, и смотрите, и чудитеся чудесем и изчезните: понеже дело Аз делаю во днех ваших, емуже не имате веровати, аще кто исповесть вам.

⁶ Зане, се, Аз возставляю Халдеи, язык горький и борзый, ходящий по широтам земли, еже наследити селения не своя:

⁷ страшен и явлен есть, от него суд его будет, и взятие его от него изыдет:

⁸ и изскочат паче рысей кони его и быстрее волков аравийских, и поедут конницы его и устремятся издалеча и полетят аки орел готов на ядь.

⁹ Скончание на нечестивыя приидет, сопротивляющыяся лицам их противу, и соберет яко песок пленники.

¹⁰ И той над царьми посмеется, и мучителие играние его, и той над всякою тверделию поругается, и обложит вал, и возобладает ею.

¹¹ Тогда пременит дух и прейдет и помолится: сия крепость богу моему.

¹² Неси ли Ты искони, Господи Боже, Святый мой? И не умрем. Господи, на суд учинил еси его, и созда мя обличати наказание его.

¹³ Чисто око еже не видети зла и взирати на труды болезненныя: вскую призираеши на презорливыя? Премолчаваеши, егда пожирает нечестивый праведнаго?

¹⁴ И сотвориши человеки яко рыбы морския и яко гады не имущыя старейшины.

¹⁵ Скончание удою восхити и привлече его мрежею и собра его сетьми своими: сего ради возвеселится и возрадуется сердце его:

¹⁶ сего ради пожрет мрежи своей и покадит сеть свою, яко теми разблажи часть свою и пищи своя избранныя:

¹⁷ сего ради прострет мрежу свою и присно избивати языков не пощадит.