Библия на церковно-славянском языке - транслитерация современным русским алфавитом
(1751)

Притчи

◄◄ | ◄ | Глава ⚫ | ► | ►►

¹ Притчи Соломона сына Давидова, иже царствова во Израили,

² познати премудрость и наказание и уразумети словеса мудрости,

³ прияти же извития словес и разрешения гаданий, уразумети же правду истинную и суд исправляти:

⁴ да даст незлобивым коварство, отрочати же юну чувство же и смысл.

⁵ Сих бо послушав, мудрый премудрее будет, а разумный строителство стяжет:

⁶ уразумеет же притчу и темное слово, речения же премудрых и гадания.

⁷ Начало премудрости страх Господень, разум же благ всем творящым его: благочестие же в Бога начало чувства, премудрость же и наказание нечестивии уничижат.

⁸ Слыши, сыне, наказание отца твоего и не отрини заветов матере твоея:

⁹ венец бо благодатей приимеши на твоем версе и гривну злату о твоей выи.

¹⁰ Сыне, да не прельстят тебе мужие нечестивии, ниже да восхощеши,

¹¹ аще помолят тя, глаголюще: иди с нами, приобщися крове, скрыем же в землю мужа праведна неправедно:

¹² пожрем же его якоже ад жива, и возмем память его от земли,

¹³ стяжание его многоценное приимем, исполним же домы нашя корыстей:

¹⁴ жребий же твой положи с нами: обще же влагалище стяжем вси, и мешец един да будет всем нам.

¹⁵ Не иди в путь с ними: уклони же ногу твою от стезь их:

¹⁶ нозе бо их на зло текут, и скори суть излияти кровь.

¹⁷ Не без правды бо простираются мрежи пернатым:

¹⁸ тии бо убийству приобщающеся, сокровищствуют себе злая: разрушение же мужей законопреступных зло.

¹⁹ Сии путие суть всех творящих беззаконная: нечестием бо свою душу отемлют.

²⁰ Премудрость во исходех поется, в стогнах же дерзновение водит,

²¹ на краех же стен проповедуется, у врат же сильных приседит, во вратех же града дерзающи глаголет:

²² елико убо время незлобивии держатся правды, не постыдятся: безумнии же досады суще желателие, нечестивии бывше, возненавидеша чувство

²³ и повинни быша обличением. Се, предложу вам моего дыхания речение, научу же вас моему словеси.

²⁴ Понеже звах, и не послушасте, и простирах словеса, и не внимасте,

²⁵ но отметасте моя советы и моим обличением не внимасте:

²⁶ убо и аз вашей погибели посмеюся, порадуюся же, егда приидет вам пагуба,

²⁷ и егда приидет на вы внезапу мятеж, низвращение же подобно бури приидет, или егда приидет вам печаль и градоразорение, или егда найдет на вы пагуба.

²⁸ Будет бо егда призовете мя, аз же не послушаю вас: взыщут мене злии и не обрящут.

²⁹ Возненавидеша бо премудрость, словесе же Господня не прияша:

³⁰ ниже хотеша внимати моим советом, ругахуся же моим обличением.

³¹ Темже снедят своих путий плоды и своего нечестия насытятся:

³² ибо, зане обидеша младенцев, убиени будут, и истязание нечестивыя погубит.

³³ Мене же слушаяй вселится на уповании и почиет без страха от всякаго зла.