Библия на церковно-славянском языке - транслитерация современным русским алфавитом
(1751)

Первая книга Моисеева Бытие

◄◄ | ◄ | Глава ⚫ | ► | ►►

¹ Авраам же бяше стар, заматеревший во днех: и Господь благослови Авраама во всех.

² И рече Авраам рабу своему старейшему дому своего, обладающему всеми его: положи руку твою под стегно мое,

³ и заклену тя Господем Богом небесе и Богом земли, да не поймеши сыну моему Исааку жены от дщерей Хананейских, с нимиже аз живу в них:

⁴ но токмо на землю мою, идеже родихся, пойдеши, и ко племени моему, и поймеши жену сыну моему Исааку оттуду.

⁵ Рече же к нему раб: еда убо не восхощет ити жена вслед со мною на землю сию, возвращу ли сына твоего в землю, от неяже изшел еси?

⁶ Рече же к нему Авраам: внемли себе, да не возвратиши сына моего онамо.

⁷ Господь Бог небесе и Бог земли, Иже поя мя из дому отца моего и от земли, в нейже родихся, Иже глагола мне и Иже кляся мне, глаголя: тебе дам землю сию и семени твоему, Той послет Ангела Своего пред тобою, и поймеши жену сыну моему Исааку оттуду:

⁸ аще же не восхощет жена поити с тобою в землю сию, чист будеши от заклятия моего: точию сына моего не возврати тамо.

⁹ И положи раб руку свою под стегно Авраама господина своего, и кляся ему о словеси сем.

¹⁰ И взя раб десять велблюд от велблюд господина своего, и от всех благ господина своего с собою, и востав иде в Месопотамию во град Нахоров:

¹¹ и постави велблюды вне града у кладязя воднаго под вечер, егда исходят (жены) почерпати воды,

¹² и рече: Господи, Боже господина моего Авраама, благоустрой предо мною днесь, и сотвори милость с господином моим Авраамом:

¹³ се, аз стах у кладязя воднаго, дщери же живущих во граде исходят почерпати воды:

¹⁴ и будет девица, ейже аз реку: преклони водонос твой, да пию, и речет ми: пий ты, и велблюды твоя напою, дондеже напиются: сию уготовал еси рабу Твоему Исааку: и по сему увем, яко сотворил еси милость с господином моим Авраамом.

¹⁵ И бысть прежде неже скончати ему глаголющу во уме своем, и се, Ревекка исхождаше, яже родися Вафуилу, сыну Мелхи жены Нахора, брата же Авраамля, держащи водонос на рамех своих:

¹⁶ девица же бяше доброзрачна зело: дева бе, муж не позна ея. Сошедши же на кладязь, наполни водонос свой и взыде.

¹⁷ Тече же раб во сретение ей и рече: напой мя мало водою от водоноса твоего.

¹⁸ Сия же рече: пий, господине. И потщася, и сня водонос на мышца своя, и напои его, дондеже напися.

¹⁹ И рече: и велблюдом твоим налию, дондеже вси напиются.

²⁰ И потщася, и испраздни водонос в поило: и тече паки на кладязь почерпнути воды, и влия велблюдом всем.

²¹ Человек же выразумеваше ю и помолчеваше, да уразумеет, аще благоустрои Бог путь ему, или ни.

²² Бысть же егда престаша вси велблюды пиюще, взя человек усерязи златы весом по драхме и два запястия на руки ея: десять златниц вес их.

²³ И вопроси ю и рече: чия еси дщерь? Повеждь ми, аще есть у отца твоего место нам витати?

²⁴ Она же рече ему: дщерь Вафуилева есмь (сына) Мелхина, егоже роди Нахору.

²⁵ И рече ему: и плевы и сена много у нас, и место витати.

²⁶ И благословив человек, поклонися Господу

²⁷ и рече: благословен Господь Бог господина моего Авраама, Иже не остави правды Своея и истины от господина моего: и мене благоустрои Господь в дом брата господина моего.

²⁸ И текши девица в дом матере своея, поведа по глаголом сим.

²⁹ Ревекце же бяше брат, емуже имя Лаван: и тече Лаван к человеку вон на кладязь.

³⁰ И бысть егда виде усерязи, и запястия на руку сестры своея, и егда слыша словеса Ревекки сестры своея, глаголющия: сице глагола мне человек: и прииде к человеку, стоящу ему у велблюд у кладязя,

³¹ и рече ему: гряди, вниди благословенный от Господа, почто стоиши вне? Аз же уготовах храмину и место велблюдом.

³² И вниде человек в дом, и разседла велблюды, и даде плевы и сено велблюдом, и воду умыти нозе его, и ноги мужем, иже бяху с ним:

³³ и предложи им хлебы ясти, и рече: не ям, дондеже возглаголю словеса моя. И рече: глаголи.

³⁴ И рече: раб Авраамль есмь аз:

³⁵ Господь же благослови господина моего зело, и возвысися: и даде ему овцы и телцы, сребро и злато, рабы и рабыни, и велблюды и ослы:

³⁶ и роди Сарра, жена господина моего, сына единаго господину моему, состаревшемуся ему, и даде ему елика имяше:

³⁷ и закля мя господин мой, глаголя: не поймеши жены сыну моему от дщерей Хананейских, в нихже аз обитаю в земли их:

³⁸ но в дом отца моего пойдеши, и в племя мое, и поймеши жену сыну моему оттуду:

³⁹ рех же (аз) господину моему: а егда не восхощет жена со мною ити?

⁴⁰ И рече ми: Господь Бог, Емуже благоугодих пред ним, он послет Ангела Своего с тобою и благоустроит путь твой, и поймеши жену сыну моему от племене моего и от дому отца моего:

⁴¹ тогда будеши чист от заклинания моего: егда бо дойдеши в племя мое, и не дадят ти, и будеши чист от заклинания моего:

⁴² и пришед днесь на кладязь, рекох: Господи, Боже господина моего Авраама, аще Ты благоустрояеши путь мой, в оньже ныне аз иду:

⁴³ се, аз стах у кладязя воднаго, и дщери граждан исходят почерпати воды: и будет девица, ейже аще аз реку: напой мя от водоноса твоего мало водою:

⁴⁴ и речет ми: и ты пий, и велблюдом твоим влию: сия (будет) жена, юже уготова Господь рабу Своему Исааку: и по сему уразумею, яко сотворил еси милость господину моему Аврааму.

⁴⁵ И бысть прежде неже скончати мне глаголющу во уме своем, абие Ревекка исхождаше держащи водонос на раму, и сниде на кладязь, и почерпе воды: и рекох ей: напой мя.

⁴⁶ И потщавшися сня водонос с себе на мышцу свою и рече: пий ты, и велблюды твоя напою. И напихся, и велблюды моя напои.

⁴⁷ И вопросих ю и рекох: чия еси дщерь? Повеждь ми. Она же рече: дщерь Вафуилева есмь сына Нахорова, егоже роди ему Мелха. И дах ей усерязи, и запястия на руце ея,

⁴⁸ и благоволив поклонихся Господу: и благослових Господа Бога господина моего Авраама, Иже благоустрои мя на пути истины пояти дщерь брата господина моего сыну его:

⁴⁹ аще убо сотворите вы милость и правду к господину моему: аще же ни, поведите ми: да обращуся или на десно, или на лево.

⁵⁰ Отвещавша же Лаван и Вафуил, рекоста: от Господа прииде дело сие: не возможем ти противу рещи зло или благо:

⁵¹ се, Ревекка пред тобою: поемь ю, иди: и да будет жена сыну господина твоего, якоже глагола Господь.

⁵² Бысть же егда услыша раб Авраамль словеса сия, поклонися до земли Господу.

⁵³ И изнес раб сосуды златы и сребряны и ризы, даде Ревекце: и дары даде брату ея и матери ея.

⁵⁴ И ядоша и пиша и той и мужие, иже бяху с ним, и почиша. И востав заутра, рече: отпустите мя, да отиду к господину моему.

⁵⁵ Реша же братия ея и мати: да пребудет девица с нами яко десять дний, и посем пойдет.

⁵⁶ Он же рече к ним: не держите мя, Господь бо благоустрои путь мой во мне: отпустите мя, да иду к господину моему.

⁵⁷ Они же реша: призовем девицу и вопросим ея изоуст.

⁵⁸ И призваша Ревекку и реша ей: пойдеши ли с человеком сим? Она же рече: пойду.

⁵⁹ И отпустиша Ревекку сестру свою, и имения ея, и раба Авраамля, и иже с ним быша.

⁶⁰ И благословиша Ревекку и реша ей: сестра наша еси, буди в тысящы тем, и да наследит семя твое грады супостат.

⁶¹ Воставши же Ревекка и рабыни ея, вседоша на велблюды и поидоша с человеком. И поим раб Ревекку, отиде.

⁶² Исаак же прехождаше сквозе пустыню у кладязя Видения: сам же живяше на земли на полудне.

⁶³ И изыде Исаак поглумитися на поле к вечеру, и воззрев очима своима, виде велблюды идущыя.

⁶⁴ И воззревши Ревекка очима своима, виде Исаака: и изскочи с велблюда.

⁶⁵ И рече рабу: кто есть человек оный, иже идет по полю во сретение нам? Рече же раб: сей есть господин мой. Она же вземши ризу летнюю, облечеся.

⁶⁶ И поведа раб Исааку вся словеса, яже сотвори.

⁶⁷ Вниде же Исаак в дом матере своея, и поя Ревекку, и бысть ему жена: и возлюби ю, и утешися Исаак по Сарре матери своей.