Библия на церковно-славянском языке - транслитерация современным русским алфавитом
(1751)

Книга Сираха

◄◄ | ◄ | Глава ⚫ | ► | ►►

¹ Тщетны надежды и лживы (суть) неразумиву мужу, и сония вперяют безумных.

² Якоже емляйся за стень и гоняй ветры, такожде емляй веру сном:

³ сие по сему видение снов, прямо лицу подобие лица.

⁴ От нечистаго что очистится, и от лживаго кая истина?

⁵ Волшебства и обаяния и сония суетна суть, и якоже раждающия сердцу мечтания бывают:

⁶ аще не от Вышняго послана будут на посещение, не вдаждь в ня сердца твоего:

⁷ многих бо прельстиша сония, и отпадоша надеющеся на ня.

⁸ Без лжи совершится закон, и премудрость во устех верных совершение.

⁹ Муж ученый уведа много, и многоискусный повесть разум.

¹⁰ Иже не искусися, мало весть: обходяй же страны умножит хитрость.

¹¹ Много видех во обхождении моем, и вящшая словес моих разум мой:

¹² многащи даже до смерти бедствовах, и спасен бых сих ради.

¹³ Дух боящихся Господа поживет, надежда бо их на Спасающаго я.

¹⁴ Бояйся Господа ни чего убоится и не устрашится, Той бо надежда ему.

¹⁵ Боящемуся Господа блаженна душа: чим одержится, и кто ему утверждение?

¹⁶ Очи Господни на любящыя Его: защищение силы и утверждение крепости, покров от вара и покров в полудне, хранение от претыкания и помощь от падения:

¹⁷ воздвизаяй душу и просвещаяй очи, изцеление даяй, живот и благословение.

¹⁸ Иже приносит жертву от неправды, приношение порочно, и не суть во благоволение дары беззаконных.

¹⁹ Не благоволит Вышний о приношении нечестивых, ни множеством жертв очистит грехи.

²⁰ Яко жряй сына пред отцем его, тако приносяй жертвы от имения убогих.

²¹ Хлеб убогим живот убогих, лишаяй его человек кровей есть.

²² Убивает искренняго отемляй ему поживление, и проливает кровь лишаяй мзды наемника.

²³ Един созидаяй, а другий разоряяй, что успеет более, токмо труд?

²⁴ Единому молящуся, а другому проклинающу, коего глас услышит Владыка?

²⁵ Омываяйся от мертвеца и паки прикасаяйся ему, кая польза ему от бани?

²⁶ Тако человек постяйся о гресех своих и паки ходяй и таяжде творяй, мольбу его кто услышит, и что успе смирением своим?