Библия на церковно-славянском языке - транслитерация современным русским алфавитом
(1751)

Книга Сираха

◄◄ | ◄ | Глава ⚫ | ► | ►►

¹ Делатель пиянивый не будет богат, и уничижаяй малая по мале упадет.

² Вино и жены превратят разумивых, и прилагаяйся любодейцам дерзший будет:

³ молие и червие наследят его, и душа дерзостная измется.

⁴ Емляй скоро веру легок сердцем, и согрешаяй на душу свою согрешает.

⁵ Веселяйся сердцем о злонравии обличен будет, противляяйся же похотем венчает живот свой.

⁶ Обуздаваяй язык тихомирно поживет, и ненавидяй велеречия умалит порок.

⁷ Словесе никогдаже повтори, и ничтоже тебе умалится.

⁸ На друга и на врага не поведай, и аще не будет тебе греха, не открывай:

⁹ слыша бо у тебе, и соблюдет тя, и во время возненавидит тя.

¹⁰ Слышал ли еси слово, да умрет с тобою: не убойся, не расторгнет тебе.

¹¹ От лица словесе поболит буй, якоже раждающая от лица младенца.

¹² Стрела вонзена в стегно плоти, тако слово во чреве буяго.

¹³ Обличи друга, егда еще не сотворил, и аще сотворил, да не приложит ктому:

¹⁴ обличи друга, негли не рече, и аще рече единожды, да не повторит:

¹⁵ обличи друга, многажды бо бывает навет.

¹⁶ Не всякому словеси емли веры.

¹⁷ Есть поползаяйся словом, а не душею: и кто не согреши языком своим?

¹⁸ Обличи искренняго своего прежде прещения, и даждь место закону Вышняго. Всяка премудрость страх Господень, и во всяцей премудрости творение закона.

¹⁹ И несть премудрость ведение лукавства, и несть разума, идеже совет грешных.

²⁰ Есть лукавство, и то мерзость, и есть безумен умаляяйся премудростию.

²¹ Лучше есть умаляяйся в разуме боязливый, нежели избыточествуяй мудростию и преступая закон.

²² Есть коварство испытно, и то неправедно, и есть развращаяй благодать извещати хотя суд.

²³ Есть лукавствуяй поник чернотою, и внутренняя его исполнь льсти:

²⁴ понича лицем и притворяяйся глух, идеже не познан бысть, предварит тя.

²⁵ И аще немощию крепости возбранен будет согрешити, аще обрящет время, зло сотворит.

²⁶ От зрака познан будет муж, и сретением лица познан будет умный.

²⁷ Одеяние мужа и смех зубов и стопы человека возвестят, яже о нем.

²⁸ Есть обличение, еже несть красно, и есть молчай, и той мудр.