Библия на церковно-славянском языке - транслитерация современным русским алфавитом
(1751)

Книга Сираха

◄◄ | ◄ | Глава ⚫ | ► | ►►

¹ Господь созда от земли человека, и паки возврати его в ню.

² Дни числа и время даде им, и даде им власть над сущими на ней.

³ Якоже они сами, облече их крепостию, и по образу Своему сотвори я:

⁴ и положи страх его на всяцей плоти, еже властелствовати зверьми (и скоты) и птицами.

⁵ Помышление и язык и очи, уши и сердце даде им размышляти:

⁶ художеством разума исполни я и добрая и злая показа им.

⁷ Положил есть око Свое на сердцах их, показати им величество дел Своих,

⁸ да имя святыни Его восхвалят и да поведают величества дел Его.

⁹ Приложил им художество и закон живота даде в наследие им.

¹⁰ Завет вечный постави с ними и судбы Своя показа им.

¹¹ Величество славы видеша очеса их, и славу гласа их слыша ухо их.

¹² И рече им: внемлите от всякия неправды. И заповеда им комуждо о искреннем.

¹³ Путие их пред Ним выну, не укрыются от очию Его.

¹⁴ Комуждо языку устроил вожда,

¹⁵ и часть Господня Израиль есть.

¹⁶ Вся дела их яко солнце пред Ним, и очи Его выну на путех их:

¹⁷ не укрышася неправды их от Него, и вси греси их пред Господем.

¹⁸ Милостыня мужа яко печать с Ним, и благодать человечу яко зеницу соблюдет.

¹⁹ По сих востанет и воздаст им, и воздаяние их на главу их воздаст:

²⁰ обаче кающымся дал есть возвращение и утеши изнемогающих терпением.

²¹ Обратися убо ко Господу и остави грехи:

²² помолися пред лицем и умали претыкания:

²³ восходи к Вышнему и отвратися от неправды, и зело возненавиди мерзость.

²⁴ Вышняго кто восхвалит во аде, вместо живых и дающих исповедание?

²⁵ От мертвеца яко ничто сущаго погибает исповедание:

²⁶ живый же и здравый восхвалит Господа.

²⁷ Коль велика милость Господня и очищение обращающымся к Нему?

²⁸ Не могут бо вся быти в человецех:

²⁹ яко не безсмертен сын человеческий.

³⁰ Что светлее солнца? И то изчезает: и зло помыслит плоть и кровь.

³¹ Силу высоты небесныя Той Сам назирает, человецы же вси земля и пепел.