Библия на церковно-славянском языке - транслитерация современным русским алфавитом
(1751)

Книга Сираха

◄◄ | ◄ | Глава ⚫ | ► | ►►

¹ Не желай чад множества неключимых, ниже веселися о сынех нечестивых: егда умножатся, не веселися о них, аще несть страха Господня с ними.

² Не веруй животу их и не належи на множество их:

³ лучше бо един праведник, нежели тысяща (грешник),

⁴ и умрети безчадному, нежели имети чада нечестива:

⁵ от единаго бо разумна населится град, колено же беззаконных запустеет.

⁶ Многа сицевая виде око мое, и крепльшая сих слыша ухо мое.

⁷ В соборищи грешных возгорится огнь, и во языце непокориве возгорится гнев.

⁸ Не умолен бысть (Бог) о древних исполинех, иже отступиша крепостию своею:

⁹ не пощаде о жилищи Лотове, имиже возгнушася за гордыню их:

¹⁰ не помилова языка погибельнаго, вознесшагося во гресех своих,

¹¹ и тако шесть сот тысящ пешцев, сошедшихся в жестосердии своем. И аще будет един жестоковыйный в людех, дивно есть сие, аще неповинен будет.

¹² Милость бо и гнев у Него, силен умолен быти и излияти гнев.

¹³ По мнозей милости Его, тако много и обличение Его: мужеви но делом его судит.

¹⁴ Не убежит хищением грешный, и терпение благовернаго не лишено будет.

¹⁵ Всяцей милостыни сотворит место: кийждо бо по делом своим обрящет.

¹⁶ Не рцы, яко от Господа скрыюся, еда свыше кто мя помянет?

¹⁷ В людех множайших не воспомянен буду, что бо есть душа моя в безчисленней твари?

¹⁸ Се, небо и небо небесе Божия, бездна и земля посещением Его подвигнутся:

¹⁹ вкупе горы и основания земли, егда воззрит на ня, трепетом стрясутся,

²⁰ и о сих не размыслит сердце:

²¹ и пути Его кто постигнет? И бурю юже не узрит человек, множайшая же дел Его в сокровенных:

²² дела правды Его кто возвестит? Или кто стерпит? Далече бо завет.

²³ Умаляяйся сердцем размышляет сия, а муж безумен и заблуждаяй размышляет буяя.

²⁴ Послушай мене, чадо, и научися ведения, и на словеса моя внимай сердцем твоим:

²⁵ изявляю в мериле наказание и со испытанием возвещу ведение.

²⁶ Судом Господним дела Его из начала, и от сотворения Его раздели части их:

²⁷ украси во век дела Своя, и начала их в роды их: ниже взалкаша, ниже утрудишася, и не престаша от дел своих.

²⁸ Кийждо искренняго своего не оскорби,

²⁹ и даже до века не воспротивятся глаголголу Его.

³⁰ И по сих Господь на землю призре и исполни ю от благ Своих:

³¹ душа всякаго животна покры лице ея, и в ню возвращение их.