Библия на церковно-славянском языке - транслитерация современным русским алфавитом
(1751)

Апокалипсис

◄◄ | ◄ | Глава ⚫ | ► | ►►

¹ Ангелу Ефесския церкве напиши: тако глаголет Держяй седмь звезд в деснице Своей, Ходяй посреде седми светилников златых:

² вем твоя дела, и труд твой, и терпение твое, и яко не можеши носити злых, и искусил еси глаголющыяся быти апостолы, и не суть, и обрел еси их ложных:

³ и понесл еси, и терпение имаши, и за имя Мое трудился еси и не изнемогл еси.

⁴ Но имам на тя, яко любовь твою первую оставил еси.

⁵ Помяни убо, откуду спал еси, и покайся, и первая дела сотвори: аще же ни, гряду тебе скоро и двигну светилник твой от места своего, аще не покаешися.

⁶ Но се имаши, яко ненавидиши дел Николаитских, ихже и Аз ненавижду.

⁷ Имеяй ухо да слышит, что Дух глаголет церквам: побеждающему дам ясти от древа животнаго, еже есть посреде рая Божия.

⁸ И Ангелу церкве Смирнския напиши: тако глаголет Первый и Последний, Иже бысть мертв, и (се,) жив есть:

⁹ вем твоя дела и скорбь и нищету, но богат еси, и хулы глаголющихся быти Иудей, и не суть, но сонмище сатанино.

¹⁰ Не бойся ничесоже, яже имаши пострадати. Се, имать диавол всаждати от вас в темницы, да искуситеся: и имети будете скорбь до десяти дний. Буди верен даже до смерти, и дам ти венец живота.

¹¹ Имеяй ухо слышати да слышит, что Дух глаголет церквам: побеждаяй не имать вредитися от смерти вторыя.

¹² И Ангелу Пергамския церкве напиши: тако глаголет Имеяй мечь обоюду изощрен:

¹³ вем дела твоя, и где живеши, идеже престол сатанин: и держиши имя Мое, и не отверглся еси веры Моея и в (Моя) дни, в няже Антипас свидетель Мой верный, иже убиен бысть в вас, идеже живет сатана.

¹⁴ Но имам на тя мало, яко имаши ту держащих учение Валаамово, иже учаше Валака положити соблазн пред сынми Израилевыми, ясти жертвы идолския и любы творити.

¹⁵ Тако имаши и ты держащыя учение Николаитско, егоже ненавижду.

¹⁶ Покайся: аще ли ни, прииду тебе скоро и брань сотворю с ними мечем уст Моих.

¹⁷ Имеяй ухо слышати да слышит, что Дух глаголет церквам: побеждающему дам ясти от манны сокровенныя, и дам ему камень бел и на камени имя ново написано, егоже никтоже весть, токмо приемляй.

¹⁸ И Ангелу Фиатирския церкве напиши: тако глаголет Сын Божий, Имеяй очи свои яко пламень огнен, и нозе Его подобне халколивану:

¹⁹ вем твоя дела и любовь, и службу и веру, и терпение твое и дела твоя, и последняя болша первых.

²⁰ Но имам на тя мало, яко оставляеши жене Иезавели, глаголющей себе быти пророчицу, учити и льстити Моя рабы, любодействовати и снести жертву идолскую.

²¹ И дах ей время, да покается от любодейства своего, и не покаяся.

²² Се, Аз полагаю ю на одре и любодеющыя с нею в скорбь велию, аще не покаются от дел своих:

²³ и чада их умрут смертию: и уразумеют вся церкви, яко Аз есмь испытаяй сердца и утробы: и дам вам комуждо по делом вашым.

²⁴ Вам же глаголю и прочым сущым в Фиатире, иже не имут учения сего и иже не разумеют глубин сатаниных, якоже глаголют: не возложу на вы тяготы иныя:

²⁵ токмо, еже имате, держите, дондеже прииду.

²⁶ И побеждающему и соблюдающему дела Моя до конца, дам ему власть на языцех,

²⁷ и упасет я жезлом железным, яко сосуды скудельничи сокрушатся, якоже и Аз приях от Отца Моего:

²⁸ и дам ему звезду утреннюю.

²⁹ Имеяй ухо слышати да слышит, что Дух глаголет церквам.