Библия на церковно-славянском языке - транслитерация современным русским алфавитом
(1751)

Псалтирь

◄◄ | ◄ | Глава ⚫ | ► | ►►

¹ Бог отмщений Господь, Бог отмщений не обинулся есть.

² Вознесися, Судяй земли, воздаждь воздаяние гордым.

³ Доколе грешницы, Господи, доколе грешницы восхвалятся?

⁴ Провещают и возглаголют неправду, возглаголют вси делающии беззаконие?

⁵ Люди Твоя, Господи, смириша, и достояние Твое озлобиша:

⁶ вдовицу и сира умориша, и пришелца убиша,

⁷ и реша: не узрит Господь, ниже уразумеет Бог Иаковль.

⁸ Разумейте же, безумнии в людех, и буии некогда, умудритеся:

⁹ насаждей ухо, не слышит ли? Или создавый око, не сматряет ли?

¹⁰ Наказуяй языки, не обличит ли, учай человека разуму?

¹¹ Господь весть помышления человеческая, яко суть суетна.

¹² Блажен человек, егоже аще накажеши, Господи, и от закона Твоего научиши его:

¹³ укротити его от дний лютых, дондеже изрыется грешному яма.

¹⁴ Яко не отринет Господь людий Своих, и достояния Своего не оставит:

¹⁵ дондеже правда обратится на суд, и держащиися ея вси правии сердцем.

¹⁶ Кто востанет ми на лукавнующыя? Или кто спредстанет ми на делающыя беззаконие?

¹⁷ Аще не Господь помогл бы ми, вмале вселилася бы во ад душа моя.

¹⁸ Аще глаголах: подвижеся нога моя, милость Твоя, Господи, помогаше ми:

¹⁹ по множеству болезней моих в сердцы моем, утешения Твоя возвеселиша душу мою.

²⁰ Да не пребудет Тебе престол беззакония, созидаяй труд на повеление.

²¹ Уловят на душу праведничу, и кровь неповинную осудят.

²² И бысть мне Господь в прибежище, и Бог мой в помощь упования моего:

²³ и воздаст им Господь беззаконие их, и по лукавствию их погубит я Господь Бог.