Библия на церковно-славянском языке - транслитерация современным русским алфавитом
(1751)

Псалтирь

◄◄ | ◄ | Глава ⚫ | ► | ►►

¹ Исповедайтеся Господеви, яко благ, яко в век милость Его.

² Да рекут избавленнии Господем, ихже избави из руки врага,

³ и от стран собра их, от восток и запад, и севера и моря:

⁴ заблудиша в пустыни безводней, пути града обителнаго не обретоша:

⁵ алчуще и жаждуще, душа их в них изчезе.

⁶ И воззваша ко Господу, внегда скорбети им, и от нужд их избави я:

⁷ и настави я на путь прав, внити во град обителный.

⁸ Да исповедятся Господеви милости Его и чудеса Его сыновом человеческим:

⁹ яко насытил есть душу тщу, и душу алчущу исполни благ:

¹⁰ седящыя во тме и сени смертней, окованныя нищетою и железом,

¹¹ яко преогорчиша словеса Божия, и совет Вышняго раздражиша.

¹² И смирися в трудех сердце их, и изнемогоша, и не бе помагаяй.

¹³ И воззваша ко Господу, внегда скорбети им, и от нужд их спасе я:

¹⁴ и изведе я из тмы и сени смертныя, и узы их растерза.

¹⁵ Да исповедятся Господеви милости Его и чудеса Его сыновом человеческим:

¹⁶ яко сокруши врата медная, и вереи железныя сломи.

¹⁷ Восприят я от пути беззакония их: беззаконий бо ради своих смиришася.

¹⁸ Всякаго брашна возгнушася душа их, и приближишася до врат смертных.

¹⁹ И воззваша ко Господу, внегда скорбети им, и от нужд их спасе я:

²⁰ посла слово Свое, и изцели я, и избави я от растлений их.

²¹ Да исповедятся Господеви милости Его и чудеса Его сыновом человеческим:

²² и да пожрут Ему жертву хвалы и да возвестят дела Его в радости.

²³ Сходящии в море в кораблех, творящии делания в водах многих,

²⁴ тии видеша дела Господня и чудеса Его во глубине.

²⁵ Рече, и ста дух бурен, и вознесошася волны его:

²⁶ восходят до небес и низходят до бездн: душа их в злых таяше:

²⁷ смятошася, подвигошася яко пияный, и вся мудрость их поглощена бысть.

²⁸ И воззваша ко Господу, внегда скорбети им, и от нужд их изведе я:

²⁹ и повеле бури, и ста в тишину, и умолкоша волны его.

³⁰ И возвеселишася, яко умолкоша, и настави я в пристанище хотения Своего.

³¹ Да исповедятся Господеви милости Его и чудеса Его сыновом человеческим:

³² да вознесут Его в церкви людстей, и на седалищи старец восхвалят Его.

³³ Положил есть реки в пустыню и исходища водная в жажду,

³⁴ землю плодоносную в сланость, от злобы живущих на ней.

³⁵ Положил есть пустыню во езера водная и землю безводную во исходища водная.

³⁶ И насели тамо алчущыя, и составиша грады обителны:

³⁷ и насеяша села, и насадиша винограды, и сотвориша плод житен.

³⁸ И благослови я, и умножишася зело: и скоты их не умали.

³⁹ И умалишася и озлобишася от скорби зол и болезни:

⁴⁰ излияся уничижение на князи их, и облазни я по непроходней, а не по пути.

⁴¹ И поможе убогу от нищеты и положи яко овцы отечествия.

⁴² Узрят правии и возвеселятся, и всякое беззаконие заградит уста своя.

⁴³ Кто премудр и сохранит сия? И уразумеют милости Господни.