Библия на церковно-славянском языке - транслитерация современным русским алфавитом
(1751)

Первая книга Маккавейская

◄◄ | ◄ | Глава ⚫ | ► | ►►

¹ И в лето сто седмьдесят второе, собра царь Димитрий силы своя и иде в Мидию собрати помощь себе, яко да ратует противу Трифона.

² И слыша Арсак царь Персский и Мидский, яко прииде Димитрий в пределы его, и посла единаго от началник своих яти его жива.

³ И иде и порази ополчение Димитриево, и ят его и приведе его ко Арсаку: и всади его в темницу.

⁴ И умолча земля Иудина во вся дни Симоновы, и взыска благая языку своему, и угодна бысть им власть его и слава его во вся дни.

⁵ И со всею славою своею взя Июппию в пристанище и сотвори вход островом морским,

⁶ и распростре пределы языку своему, и одержа страну,

⁷ и собра пленение много, и господствова над Газары и Вефсуры и краеградием, и отят нечистоты от него, и не бысть противляющагося ему.

⁸ И кийждо делаше землю свою с миром, и земля даяше жита своя, и древеса польская плод свой.

⁹ Старейшины на стогнах седяху и вси о благих беседоваху, и юноши облачахуся славою и ризами ратными.

¹⁰ Градом даяше пищы и вчиняше их в сосуды утверждения, донележе именовася имя славы его даже до края земли.

¹¹ Сотвори мир на земли, и возвеселися Израиль веселием велиим.

¹² И седе кийждо под виноградом своим и смоковницею своею, и не бысть устрашающаго их.

¹³ И оскуде ратуяй их на земли, и царие сотрошася во дни оны.

¹⁴ И укрепи всех смиренных людий своих: закона взыска и отят всяко беззаконие и лукавство,

¹⁵ святая прослави и умножи сосуды святых.

¹⁶ И слышано бе в Риме, яко умре Ионафан, и даже до Спартии слышася, и оскорбишася зело.

¹⁷ Егда же услышаша, яко Симон брат его бысть вместо его архиерей и одержа всю страну и грады в ней,

¹⁸ писаша к нему на дщицах медяных, еже обновити с ним дружбу и споборение, яже сотвориша со Иудою и Ионафаном братиею его.

¹⁹ И прочтошася пред церковию во Иерусалиме.

²⁰ И сей образ посланий, ихже послаша Спартиаты: Спартиатов началницы и град Симону иерею великому и старейшинам, и жерцем и прочым людем Иудейским братии радоватися:

²¹ послы, иже послани суть к людем нашым, возвестиша нам о вашей славе и чести, и возвеселихомся о приходе их,

²² и списахом яже от них речена в советех людий сице: Нуминий сын Антиохов и Антипатр Иасонов, послы Иудейстии, приидоста к нам возновляюща с нами дружбу:

²³ и угодно бысть людем прияти мужы славно и положити восписание словес их во особыя людския книги, да будет память людем Спартиатов: образ же тех писахом Симону архиерею.

²⁴ По сих посла Симон Нуминиа в Рим, имущаго щит злат велик весом мнас тысяща на уставление с ними дружбы.

²⁵ Егда же услышаша людие словеса сия, реша: кую благодать воздадим Симону и сыном его?

²⁶ Утверди бо сам и братия его и дом отца его, и поби враги Израилевы от них, и уставиша ему свободу.

²⁷ И написаша на дсках медяных и поставиша на столпе в горе Сионе. И сей есть образ писания: во осмыйнадесять день месяца Елул, лета сто седмьдесят втораго, и сие третие лето при Симоне архиереи, в Сарамели,

²⁸ в собрании велицем жерцев и людий, и князей языка и старейшин страны возвестися нам: понеже многащи быша брани в стране,

²⁹ Симон же сын Маттафиев, сын сынов Иаривовых, и братия его вдаша себе в бедство, и противосташа сопостатом языка своего, яко да стоят святая их и закон, и славою великою прославиша люди своя:

³⁰ и собра Ионафан люди своя, и бысть им архиерей, и приложися к людем своим:

³¹ и хотеша врази их внити в страну их, еже сокрушити страну их и простерти руку на святая их,

³² тогда воста Симон и брася за люди своя, и разда сребреников много своим, и вооружи мужы сильныя языка своего, и даде им оброки,

³³ и утверди грады Иудейския и Вефсуру, яже в пределех Иудейских, идеже бяху оружия бранников прежде, и постави тамо на стражу мужы Иудейския:

³⁴ и Июппию утверди, яже на примории, и Газару, яже в пределех Азота, в нейже врази прежде обитаху, и насели тамо Иудеи, и елика потребна бяху на управление сих, положи в них:

³⁵ и видеша людие действо Симоново и славу, юже умысли сотворити языку своему, и поставиша его в вожда своего и архиереа, занеже сотвори сия вся, и правду и веру, юже соблюде языку своему, и взыска всяким образом вознести люди своя:

³⁶ и во дни его благоуспеваше в руку его, еже изяти языки от страны их, и иже во граде Давидове беху во Иерусалиме, иже сотвориша себе краеградие, из негоже исхождаху и скверняху окрест святых и творяху язву велию в чистоте,

³⁷ и насели в нем мужы Иудейски и утверди ко укреплению страны и града и возвыси стены во Иерусалиме:

³⁸ и царь Димитрий устави ему началство жречества,

³⁹ по сим сотвори его друга своего и прослави его славою великою:

⁴⁰ слыша бо, яко наречени суть Иудее от Римлян друзи и споборницы и братия, и яко прияша послов Симоновых преславно:

⁴¹ и яко благоволиша Иудее и жерцы быти Симону вождом и архиереем в век, дондеже востанет Пророк верен:

⁴² и да будет над ними воевода, и яко да радеет о святых поставляти их над делами их и над страною, и над оружием и над твердынями,

⁴³ и яко да радеет о святых, и да слушают его вси, и да пишутся на имя его вся писания во стране, и да облачится в порфиру и златую ризу,

⁴⁴ и не леть будет ни комуже от людий и от жрец отврещи что от сих и вопреки глаголати от него реченым, или совокупити сонм во стране без него и облещися в порфиру и носити гривну злату:

⁴⁵ а иже аще сотворит кроме сих, или отвержет что сих, повинен будет.

⁴⁶ И угодно бысть всем людем уставити Симону и сотворити по словесем сим.

⁴⁷ И прия Симон, и благоволи архиерействовати, и быти воеводою и началником языка Иудейска и жерцем, и началствовати над всеми.

⁴⁸ И писание сие реша водрузити во дщицах медяных и поставити их в притворе святых, в месте славне,

⁴⁹ списание же сих положити в газофилакии, яко да имать Симон и сынове его.