Библия на церковно-славянском языке - транслитерация современным русским алфавитом
(1751)

Первое послание Иоанна

◄◄ | ◄ | Глава ⚫ | ► | ►►

¹ Еже бе исперва, еже слышахом, еже видехом очима нашима, еже узрехом, и руки нашя осязаша, о Словеси животнем:

² и живот явися, и видехом, и свидетелствуем, и возвещаем вам живот вечный, иже бе у Отца и явися нам:

³ еже видехом и слышахом, поведаем вам, да и вы общение имате с нами: общение же наше со Отцем и с Сыном Его Иисусом Христом.

⁴ И сия пишем вам, да радость ваша будет исполнена.

⁵ И сие есть обетование, еже слышахом от Него и поведаем вам, яко Бог свет есть, и тмы в Нем несть ни единыя.

⁶ Аще речем, яко общение имамы с Ним, и во тме ходим, лжем и не творим истины:

⁷ аще же во свете ходим, якоже Сам Той есть во свете, общение имамы друг ко другу, и Кровь Иисуса Христа Сына Его очищает нас от всякаго греха.

⁸ Аще речем, яко греха не имамы, себе прельщаем, и истины несть в нас.

⁹ Аще исповедаем грехи нашя, верен есть и праведен да оставит нам грехи нашя и очестит нас от всякия неправды.

¹⁰ Аще речем, яко не согрешихом, лжа творим Его, и слово Его несть в нас.