Библия на церковно-славянском языке - транслитерация современным русским алфавитом
(1751)

Книга пророка Исайи

◄◄ | ◄ | Глава ⚫ | ► | ►►

¹ Видите, како праведный погибе, и никтоже не приемлет сердцем, и мужие праведнии вземлются, и никтоже разумеет: от лица бо неправды взяся праведный.

² Будет с миром погребение его, взяся от среды.

³ Вы же приидите семо, сынове беззаконнии, семя прелюбодеев и блудницы:

⁴ в чем услаждастеся и на кого отверзосте уста ваша? И на кого изсунусте язык ваш? Не вы ли есте чада пагубы, семя беззаконно,

⁵ молящиися кумиром под древием частым, закалающе чада своя в дебрех посреде камения?

⁶ То твоя часть, сей твой жребий, и тем пролиял еси возлияния, и тем принесл еси жертвы: о сих убо не разгневаюся ли?

⁷ На горе высоце и превознесенне, тамо твое ложе, и тамо вознесл еси требы твоя:

⁸ и за подвоями дверий твоих положил еси память твою: мыслил еси, яко аще от Мене отступиши, более нечто возимееши: возлюбил еси спящыя с тобою,

⁹ и умножил еси блужение твое с ними, и многи сотворил, иже далече от тебе, и послал еси послы за пределы твоя, и смирился еси даже до ада.

¹⁰ Многими путьми твоими трудился еси, и не рекл еси: престану крепящься, яко сотворил еси сия, сего ради не помолился ми еси ты.

¹¹ Кого благопочет убоялся еси, и солгал Ми, и не помянул еси Мене, ниже приял Мя еси во ум, ниже в сердце твое? И Аз тя видя, презираю, и не убоялся еси Мене.

¹² И аз возвещу правду твою и злобы твоя, яже не успеют тебе:

¹³ егда возопиеши, да избавят тя во печалех твоих: сия бо вся ветр возмет, и отнесет буря: а держащиися Мене стяжут землю и наследят гору святую Мою.

¹⁴ И рекут: очистите пред лицем его пути и отимите претыкания от пути людий Моих.

¹⁵ Сия глаголет Господь Вышний, Иже живет во высоких во век, Святый во святых имя Ему, Вышний, во святых почиваяй, и малодушным даяй долготерпение и даяй живот сокрушеным сердцем:

¹⁶ не во век отмщу вам, ни всегда гневатися буду на вы: дух бо от Мене изыдет, и всякое дыхание Аз сотворих.

¹⁷ За грех мало что опечалих его и поразих его и отвратих лице Мое от него: и опечалися и пойде дряхл во путех своих.

¹⁸ Пути его видех и изцелих его, и утеших его и дах ему утешение истинно,

¹⁹ мир на мир далече и близ сущым: и рече Господь: изцелю я.

²⁰ Неправеднии же возволнуются и почити не возмогут.

²¹ Несть радоватися нечестивым, рече Господь Бог.