Библия на церковно-славянском языке - транслитерация современным русским алфавитом
(1751)

Книга пророка Исайи

◄◄ | ◄ | Глава ⚫ | ► | ►►

¹ Се бо, Царь праведный воцарится, и князи со судом владети начнут.

² И будет человек сокрываяй словеса своя, и скрыется, аки от воды носимыя: и явится в Сионе яко река текущая славная в земли жаждущей.

³ И ксему не будут уповающе на человеки, но ушы вдадят на слышание,

⁴ и сердце изнемогших вонмет послушати, и языцы немотствующии скоро научатся глаголати мир:

⁵ и ксему не рекут юродивому владети, и ксему не рекут слуги твои: молчи.

⁶ Юрод бо юродивая изречет, и сердце его тщетная уразумеет, еже совершати беззаконная и глаголати на Господа прелесть, еже растлити душы алчныя и душы жаждущыя тщы сотворити.

⁷ Совет бо злых беззаконная совещавает, растлити смиренныя словесы неправедными и разсыпати словеса смиренных на суде.

⁸ Благочестивии же смысленне совещаша, и той совет пребудет.

⁹ Жены богатыя, востаните и услышите глас мой: дщери, с надеждею слышите словеса моя:

¹⁰ дня летняго память сотворите в болезни с надеждею: потребися оымание винное, преста сеяние, и (собирание) ктому не приидет.

¹¹ Ужаснитеся, сжалитеся, уповавшыя, совлецытеся, наги будите, препояшите чресла своя во вретища

¹² и в перси бийтеся о селе желаемем и о винограднем рождении.

¹³ На земли людий моих терние и былие возникнет, и от всего дому радость восхитится: град богат,

¹⁴ домове оставленнии, богатство града и домы вожделения оставят: и будут веси пещеры до века, радость ослом дивиим, паствы пастухов:

¹⁵ дондеже найдет на ны Дух от вышняго, и будет пустыня в Хермель, а Хермель в дубраву вменится.

¹⁶ И почиет в пустыни суд, и правда в Кармиле вселится:

¹⁷ и будут дела правды мир, и одержит правда покой, и уповающе будут до века:

¹⁸ и вселятся людие его во граде мира и обитати будут уповающе, и почиют с богатством.

¹⁹ Град же, аще снидет, то не на вы приидет: и будут живущии в дубравах уповающе, якоже сущии на полях.

²⁰ Блажени сеющии при всяцей воде, идеже вол и осел попирает.