Библия на церковно-славянском языке - транслитерация современным русским алфавитом
(1751)

Книга пророка Исайи

◄◄ | ◄ | Глава ⚫ | ► | ►►

¹ Плачитеся, корабли Кархидонстии, яко погибе, и ктому не идут от земли Китиейския, отведеся пленен.

² Кому подобни быша живущии во острове, купцы Финичестии, преходящии море?

³ В воде мнозе семя купеческо, аки жатве вносимей купцы язычестии.

⁴ Усрамися, Сидоне, рече море. Крепость же морская рече: не болех, ни породих, ни вскормих юнош, ниже вознесох девиц.

⁵ Егда же слышано будет во Египте, приимет я болезнь о Тире.

⁶ Идите в Кархидон, плачитеся, живущии во острове сем.

⁷ Не сие ли бе величание вам исперва, прежде неже предану быти ему?

⁸ Кто сия совеща на Тира? Еда хуждший есть, или не крепкий есть? Купцы его славнии князи земли.

⁹ Господь Саваоф совеща разсыпати всякую гордыню славных и обезчестити всякое славное на земли.

¹⁰ Делай землю твою, ибо корабли ктому не приидут от Кархидона.

¹¹ И рука Твоя ктому не укрепеет по морю, разгневляющая царей. Господь Саваоф заповеда о Ханаане, еже погубити крепость его.

¹² И рекут: ктому не приложите укаряти и обидети дщерь Сидоню: и аще отидеши ко Китииом, ниже тамо будет тебе покой:

¹³ и в землю Халдейску, но и та опустела от Ассириан, яко стена ея падеся.

¹⁴ Плачитеся, корабли Кархидонстии, яко погибе твердыня ваша.

¹⁵ И будет в той день, оставлен будет Тир седмьдесят лет, якоже время (единаго) царя, яко время человеческо: и по седмидесятих летех будет Тир яко песнь блудницы.

¹⁶ Возми гусли, обыди град, блудница забвеная, добре погуди, много воспой, да память твоя будет.

¹⁷ И будет по седмидесятих летех, присещение сотворит Бог Тиру, и паки возставится на прежднее и будет торжище всем царствам вселенныя на лицы земли.

¹⁸ И будет его купля и мзда свято Господеви, не им собрано будет, но живущым пред Господем, вся купля его, ясти и пити и наполнитися, и в сытость, на память пред Господем.