Библия на церковно-славянском языке - транслитерация современным русским алфавитом
(1751)

Послание апостола Павла Евреям

◄◄ | ◄ | Глава ⚫ | ► | ►►

¹ Да убоимся убо, да не когда оставлену обетованию внити в покой Его, явится кто от вас лишився.

² Ибо нам благовествовано есть, якоже и онем: но не пользова онех слово слуха, не растворенное верою слышавших.

³ Входим бо в покой веровавшии, якоже рече: яко кляхся во гневе Моем, аще внидут в покой Мой: аще и делом от сложения мира бывшым.

⁴ Рече бо негде о седмем сице: и почи Бог в день седмый от всех дел Своих.

⁵ И в сем паки: аще внидут в покой Мой.

⁶ Понеже убо лишени нецыи внити в него, и имже прежде благовествовано бе, не внидоша за непослушание:

⁷ паки некий уставляет день, днесь, в Давиде глаголя, по толицех летех, якоже прежде глаголася: днесь, аще глас Его услышите, не ожесточите сердец ваших.

⁸ Аще бо бы онех Иисус упокоил, не бы о инем дни глаголал по сих.

⁹ Убо оставлено есть (и еще) субботство людем Божиим:

¹⁰ вшедый бо в покой Его, и той почи от дел своих, якоже от Своих Бог.

¹¹ Потщимся убо внити во оный покой, да не кто в ту же притчу противления впадет.

¹² Живо бо слово Божие и действенно, и острейше паче всякаго меча обоюду остра, и проходящее даже до разделения души же и духа, членов же и мозгов, и судително помышлением и мыслем сердечным.

¹³ И несть тварь неявлена пред Ним, вся же нага и объявлена пред очима Его, к Немуже нам слово.

¹⁴ Имуще убо Архиереа велика, прошедшаго небеса, Иисуса Сына Божия, да держимся исповедания.

¹⁵ Не имамы бо архиереа не могуща спострадати немощем нашым, но искушена по всяческим по подобию, разве греха.

¹⁶ Да приступаем убо с дерзновением к престолу благодати, да приимем милость и благодать обрящем во благовременну помощь.