Библия на церковно-славянском языке - транслитерация современным русским алфавитом
(1751)

Первая книга Моисеева Бытие

◄◄ | ◄ | Глава ⚫ | ► | ►►

¹ И помяну Бог Ноа, и вся звери, и вся скоты, и вся птицы, и вся гады пресмыкающыяся, елика беху с ним в ковчезе: и наведе Бог дух на землю, и преста вода.

² И заключишася источницы бездны и хляби небесныя: и удержася дождь от небесе.

³ И вспять пойде вода идущая от земли: и умаляшеся вода по сте пятидесятих днех.

⁴ И седе ковчег в месяц седмый, в двадесять седмый день месяца, на горах Араратских.

⁵ Вода же уходящи умаляшеся даже до десятаго месяца: и в десятый месяц, в первый день месяца явишася верси гор.

⁶ И бысть до четыредесятих днех отверзе Ное оконце ковчега, еже сотвори,

⁷ и посла врана (видети, аще уступила вода от лица земли): и изшед не возвратися, дондеже изсяче вода от земли.

⁸ И посла голубицу по нем видети, аще уступила вода от лица земли:

⁹ и не обретши голубица покоя ногама своима, возвратися к нему в ковчег, яко вода бяше по всему лицу всея земли: и простер руку свою, прият ю и внесе ю к себе в ковчег.

¹⁰ И премедлив еще седмь дний, паки посла голубицу из ковчега.

¹¹ И возвратися к нему голубица к вечеру, и имеяше сучец масличен с листвием во устех своих: и позна Ное, яко уступи вода от лица земли.

¹² И премедлив еще седмь дний других, паки посла голубицу, и не приложи возвратитися к нему потом.

¹³ И бысть в первое и шестьсотное лето жития Ноева, в первый день перваго месяца, изсяче вода от лица земли: и откры Ное покров ковчега, егоже сотвори, и виде, яко изсяче вода от лица земли.

¹⁴ В месяц же вторый, в двадесять седмый день месяца изсше земля.

¹⁵ И рече Господь Бог Ноеви, глаголя:

¹⁶ изыди из ковчега ты и жена твоя, и сынове твои и жены сынов твоих с тобою:

¹⁷ и вся звери, елицы суть с тобою, и всяку плоть от птиц даже до скотов, и всяк гад движущийся по земли изведи с собою: и раститеся и множитеся на земли.

¹⁸ И изыде Ное и жена его, и сынове его и жены сынов его с ним,

¹⁹ и вси зверие, и вси скоти, и вся птицы и вси гади движущиися по роду своему на земли изыдоша из ковчега.

²⁰ И созда Ное жертвенник Господеви: и взя от всех скотов чистых и от всех птиц чистых и вознесе во всесожжение на жертвенник.

²¹ И обоня Господь воню благоухания. И рече Господь Бог размыслив: не приложу ктому прокляти землю за дела человеческая, зане прилежит помышление человеку прилежно на злая от юности его: не приложу убо ктому поразити всякую плоть живущую, якоже сотворих:

²² во вся дни земли сеятва и жатва, зима и зной, лето и весна, день и нощь не престанут.