Библия на церковно-славянском языке - транслитерация современным русским алфавитом
(1751)

Первая книга Моисеева Бытие

◄◄ | ◄ | Глава ⚫ | ► | ►►

¹ И Иаков иде в путь свой. И воззрев виде полк Божий воополчившийся: и сретоша его Ангели Божии.

² Рече же Иаков, егда виде их: полк Божий сей. И прозва имя месту тому Полки.

³ Посла же Иаков послы пред собою ко Исаву брату своему в землю Сиир, в страну Едом,

⁴ и заповеда им глаголя: тако рцыте господину моему Исаву: тако глаголет раб твой Иаков: у Лавана обитах и умедлих даже до ныне:

⁵ и быша ми волове и ослы и овцы, и раби и рабыни: и послах поведати господину моему Исаву, дабы обрел раб твой благодать пред тобою.

⁶ И возвратишася послы ко Иакову, глаголюще: ходихом ко брату твоему Исаву, и се, сам идет во сретение тебе, и четыриста мужей с ним.

⁷ Убояся же Иаков зело и в недоумении бе: и раздели люди сущыя с собою, и волы и велблюды и овцы на два полка,

⁸ и рече Иаков: аще приидет Исав на един полк и изсечет и, будет вторый полк во спасении.

⁹ Рече же Иаков: Бог отца моего Авраама и Бог отца моего Исаака, Господи Боже, Ты рекий ми: иди в землю рождения твоего, и благо тебе сотворю:

¹⁰ довлеет ми от всея правды и от всея истины, юже сотворил еси рабу Твоему: с жезлом бо сим преидох Иордан сей, ныне же бех в два полка:

¹¹ изми мя от руки брата моего, от руки Исава: яко боюся аз его, да не когда пришед убиет мя и матерь с чады:

¹² ты же рекл еси: благо тебе сотворю и положу семя твое яко песок морский, иже не изочтется от множества.

¹³ И спа тамо нощи тоя, и взя, яже имяше дары, и посла Исаву брату своему:

¹⁴ коз двести, козлов двадесять, овец двести, овнов двадесять,

¹⁵ велблюдов дойных, и жребят их тридесять, волов четыредесять, юнцов десять, ослов двадесять и жребят десять:

¹⁶ и даде их рабом своим, (коеждо) стадо особо, и рече рабом своим: идите предо мною, и разстояние творите между стадом и стадом.

¹⁷ И заповеда первому глаголя: аще тя срящет Исав брат мой и вопросит тя глаголя: чий еси, и камо идеши, и чия сия, яже пред тобою идут?

¹⁸ Речеши: раба твоего Иакова: дары посла господину моему Исаву: и се, сам за нами (идет).

¹⁹ И заповеда первому, и второму, и третиему, и всем предидущым вслед стад сих глаголя: по словеси сему глаголите Исаву, егда обрящете его вы,

²⁰ и рцыте: се, раб твой Иаков идет за нами: рече бо: укрощу лице его дарами предидущими его, и посем узрю лице его: негли бо приимет лице мое?

²¹ И предидяху дары пред лицем его, сам же преспа тоя нощи в полце.

²² Востав же тоя нощи, поя обе жены (своя) и обе рабыни и единонадесять сынов своих, и прейде брод Иавок:

²³ и взя их, и прейде поток, и преведе вся своя.

²⁴ Остася же Иаков един. И боряшеся с ним Человек даже до утра.

²⁵ Виде же, яко не может противу ему: и прикоснуся широте стегна его: и отерпе широта стегна Иаковля, егда боряшеся с Ним.

²⁶ И рече ему: пусти Мя: взыде бо заря. Он же рече: не пущу Тебе, аще не благословиши мене.

²⁷ Рече же ему: что ти имя есть? Он же рече: Иаков.

²⁸ И рече ему: не прозовется ктому имя твое Иаков, но Исраиль будет имя твое: понеже укрепился еси с Богом и с человеки силен будеши.

²⁹ Вопроси же Иаков и рече: повеждь ми имя Твое. И рече: вскую сие вопрошаеши ты имене Моего? Еже чудно есть. И благослови его тамо.

³⁰ И прозва Иаков имя месту тому Вид Божий: видех бо Бога лицем к лицу, и спасеся душа моя.

³¹ Возсия же ему солнце, егда прейде Вид Божий: он же хромаше стегном своим.

³² Сего ради не ядят сынове Израилевы жилы, яже отерпе, яже есть в широте стегна, даже до дне сего: понеже прикоснуся широте стегна Иаковли жилы, яже отерпе.