Библия на церковно-славянском языке - транслитерация современным русским алфавитом
(1751)

Первая книга Моисеева Бытие

◄◄ | ◄ | Глава ⚫ | ► | ►►

¹ Явися же ему Бог у дуба Мамврийска, седящу ему пред дверми сени своея в полудни.

² Воззрев же очима своима, виде, и се, трие мужие стояху над ним: и видев притече в сретение им от дверей сени своея: и поклонися до земли

³ и рече: Господи, аще убо обретох благодать пред Тобою, не мини раба Твоего:

⁴ да принесется вода и омыются ноги ваши, и прохладитеся под древом:

⁵ и принесу хлеб, да ясте, и посем пойдете в путь свой, егоже ради уклонистеся к рабу вашему. И рекоша: тако сотвори, якоже глаголал еси.

⁶ И потщася Авраам в сень к Сарре и рече ей: ускори и смеси три меры муки чисты, и сотвори потребники.

⁷ И тече Авраам ко кравам, и взя телца млада и добра, и даде рабу, и ускори приготовити е.

⁸ И взя масло, и млеко, и телца, егоже приготова: и предложи им, и ядоша: сам же стояше пред ними под древом.

⁹ Рече же к нему: где Сарра жена твоя? Он же отвещав, рече: се, в сени.

¹⁰ Рече же: (се) возвращаяся прииду к тебе во время сие в часы, и родит сына Сарра жена твоя. Сарра же услыша пред дверми сени сущи за ним.

¹¹ Авраам же и Сарра стара (беста,) заматеревшая во днех: и престаша Сарре бывати женская.

¹² Разсмеяся же Сарра в себе, глаголющи: не у было ми убо доселе, господин же мой стар.

¹³ И рече Господь ко Аврааму: что яко разсмеяся Сарра в себе, глаголющи: еда истинно рожду? Аз же состарехся.

¹⁴ Еда изнеможет у Бога слово? В сие время возвращуся к тебе в часы, и будет Сарре сын.

¹⁵ Отречеся же Сарра, глаголющи: не разсмеяхся: убояся бо. И рече ей: ни, но разсмеялася еси.

¹⁶ Воставше же оттуду мужие, воззреша на лице Содома и Гоморра: Авраам же идяше с ними, провождая их.

¹⁷ Господь же рече: еда утаю Аз от Авраама раба Моего, яже Аз творю?

¹⁸ Авраам же бывая будет в язык велик и мног, и благословятся о нем вси языцы земнии:

¹⁹ вем бо, яко заповесть сыном своим и дому своему по себе, и сохранят пути Господни творити правду и суд, яко да наведет Господь на Авраама вся, елика глагола к нему.

²⁰ Рече же Господь: вопль Содомский и Гоморрский умножися ко Мне, и греси их велицы зело:

²¹ сошед убо узрю, аще по воплю их грядущему ко Мне совершаются: аще же ни, да разумею.

²² И обратившеся оттуду мужие, приидоша в Содом: Авраам же еще бяше стояй пред Господем.

²³ И приближився Авраам, рече: погубиши ли праведнаго с нечестивым, и будет праведник яко нечестивый?

²⁴ Аще будут пятьдесят праведницы во граде, погубиши ли я? Не пощадиши ли всего места пятидесяти ради праведных, аще будут в нем?

²⁵ Никакоже Ты сотвориши по глаголу сему, еже убити праведника с нечестивым, и будет праведник яко нечестивый: никакоже, Судяй всей земли, не сотвориши ли суда?

²⁶ Рече же Господь: аще будут в Содомех пятьдесят праведницы во граде, оставлю весь град и все место их ради.

²⁷ И отвещав Авраам, рече: ныне начах глаголати ко Господу моему, аз же есмь земля и пепел:

²⁸ аще же умалятся пятьдесят праведницы в четыредесять пять, погубиши ли четыредесяти пятих ради весь град? И рече: не погублю, аще обрящу тамо четыредесять пять.

²⁹ И приложи еще глаголати к Нему, и рече: аще же обрящутся тамо четыредесять? И рече: не погублю ради четыредесяти.

³⁰ И рече: что, Господи, аще возглаголю? Аще же обрящется тамо тридесять? И рече: не погублю тридесятих ради.

³¹ И рече: понеже имам глаголати ко Господу: аще же обрящутся тамо двадесять? И рече: не погублю, аще обрящутся тамо двадесять.

³² И рече: что, Господи, аще возглаголю еще единою? Аще же обрящутся тамо десять? И рече: не погублю десятих ради.

³³ Отиде же Господь, яко преста глаголя ко Аврааму: и Авраам возвратися на место свое.