Библия на церковно-славянском языке - транслитерация современным русским алфавитом
(1751)

Книга пророка Иезекииля

◄◄ | ◄ | Глава ⚫ | ► | ►►

¹ Ты же, сыне человечь, возми плачь на князи Израилевы,

² и речеши: почто мати твоя львица среде львов почи, посреде львов умножи львичища своя?

³ И отскочи един от львичищ ея и бысть лев, и научися восхищати восхищения и человеки снеде.

⁴ И слышаша о нем языцы, и ят бысть в растлении их, и приведоша его во узде во Египет.

⁵ И виде, яко отведен бысть от нея, и погибе чаяние ея: и взя инаго от львичищ своих и львом учини его,

⁶ и живяше посреде львов, бысть лев и научися восхищати восхищения: человеки изяде,

⁷ и пасяшеся в лютости своей, и грады их пусты постави, и погуби землю и исполнение ея гласом рыкания своего.

⁸ И даша нань языцы окрест от стран и простроша нань мрежи своя, и в погублении их ят бысть.

⁹ И положиша его во узде и в клети, приведоша его ко царю Вавилонску и ввергоша его в темницу, яко да не слышится глас его ктому на горах Израилевых.

¹⁰ Мати твоя яко виноград и яко цвет шипчан на воде насажден, плод его и отрасль его бысть от воды многи.

¹¹ И бысть ему жезл крепости над племенем старейшин, и вознесеся в величии своем среде лозия: и виде величество свое во множестве лозия своего,

¹² и обломися в ярости, и на землю повержен бысть, и ветр знойный изсуши плоды его: увядоша, и изсше жезл крепости его: огнь потреби его.

¹³ И ныне насадиша его в пустыни, на земли безводне.

¹⁴ И изыде огнь от жезла избранных его и пояде и, и не бе в нем жезла крепости его: племя в притчу плача есть, и будет плачь.