Библия на церковно-славянском языке - транслитерация современным русским алфавитом
(1751)

Книга пророка Иезекииля

◄◄ | ◄ | Глава ⚫ | ► | ►►

¹ И видех, и се, верху тверди сущия над главою Херувимов, яко камень сапфировый, подобие престола на них.

² И рече к мужу облеченому во утварь: вниди среде колес, яже под Херувимами, и наполни горсти твоя углия огненнаго от среды Херувимов и разсыпли на град. И вниде предо мною:

³ Херувими же стояху одесную дому, внегда вхождаше муж, и облак наполни двор внутренний.

⁴ И воздвижеся слава Господня от Херувимов в непокровение дому, и наполни дом облак, и двор наполнися сияния славы Господни:

⁵ и глас крил Херувимских слышашеся даже до внешняго двора, якоже глас Бога Саддаи глаголющаго.

⁶ И бысть внегда заповедаше мужу облеченому во утварь святую, глаголя: возми огнь от среды колес, иже среде Херувимов. И вниде и ста близ колес.

⁷ И простре Херувим руку свою в средину огня сущаго среде Херувимов, и взя и вдаде в руце оболченому во утварь святую, и взя и изыде.

⁸ И видех Херувимы, и се, подобие рук человечих под крилы их.

⁹ И видех, и се, четыри колеса стояху держащеся Херувимов: коло едино держашеся единаго Херувима, и коло едино держашеся другаго Херувима: взор же колес якоже взор камения анфракса:

¹⁰ и взор их подобие едино четырем, акибы было коло в колеси:

¹¹ внегда идяху, на четыри части их идяху, и не обращахуся внегда идяху: яко, на неже место аще зряше начало едино, идяху (вслед его), и не обращахуся, внегда ити им.

¹² Вся же телеса их и хребты их, и руце их и крила их и колеса полна очес окрест четырех колес.

¹³ Колесам же сим воззвася гелгель, слышащу мне.

¹⁴ Четыри же лица коемуждо их: единому лице херувимле, лице же другому лице человечо, третие же лице львово и четвертое лице орлее.

¹⁵ И взяшася Херувими: сие есть животное, еже видех на реце Ховар.

¹⁶ И егда идяху Херувими, идяху и колеса их, и сии держахуся их: и внегда воздвизаху Херувими крила своя, еже возвыситися от земли, не обращахуся колеса их, и та держахуся их:

¹⁷ егда стояху тии, стояху и они, и внегда возвышахуся тии, возвышахуся и они с ними: зане дух жизни бе в них.

¹⁸ И изыде слава Господня от непокровения дому и взыде на Херувимы.

¹⁹ И воздвигоша Херувими крила своя и возвысишася от земли предо мною: егда изыдоша тии, и колеса держахуся их: и сташа над преддверием врат Дому Господня, яже противу востоку, и слава Господа Бога Израилева бе над ними свыше.

²⁰ Сие животное есть, еже видех под Богом Израилевым на реце Ховар, и познах, яко Херувими суть.

²¹ Четыри лица единому, и четыри крила единому, и подобие рук человечих под крилы их.

²² И подобие лиц их: сия лица суть, яже видех под славою Бога Израилева при реце Ховар воззрение их: и сия кождо прямо лицу своему идяху.