Библия на церковно-славянском языке - транслитерация современным русским алфавитом
(1751)

Первая книга Паралипоменон

◄◄ | ◄ | Глава ⚫ | ► | ►►

¹ Сынове же Рувима первенца Израилева: яко той первенец: и внегда ему взыти на ложе отца своего, даде благословение его сыну своему Иосифу, сыну Израилеву, и не бысть (той) вменен в первенство,

² яко Иуда силен крепостию и в братии своей, и в вожда из него, и благословение Иосифу.

³ Сынове Рувима первенца Израилева: Енох и Фаллус, Асрон и Хармий.

⁴ Сынове Иоилевы: Семей и Ванеа сын его. Сынове же Гога сына Семеина:

⁵ сын его Миха, сын его Риха, сын его Ваал,

⁶ Векра сын его, егоже пресели Фаглафалласар царь Ассирииский: сей бысть князь колена Рувимова.

⁷ И братия его во отечестве своем, в исчислениих своих, по родом их, князь Иоиль и Захариа,

⁸ и Валек сын Азузов, сын Саммы, сын Иоилев: той обита во Ароире и в Наване и Веелмаоне,

⁹ и противу востока обита даже до входа пустыни, от реки Евфрата, яко скот их мног в земли Галаадстей.

¹⁰ Во дни же Саула возведоша брань противу Агарян: и падоша в руках их обитающии в жилищах своих вси к востоку Галаадску.

¹¹ Сынове Гадовы прямо их обиташа в земли Васани до Селха:

¹² Иоиль первенец, и Сафам вторый, и Ианин книжник Васанский.

¹³ И братия их, по домом отечеств их: Михаил и Мосоллам, и Савей и Иора, и Иохан и Иовиа и Овид, седмь.

¹⁴ Сии сынове Авихаила сына Рувиина, и Адди, сына Галаадова, сына Михаилова, сына Иессеина, сына Иедаина, сына Вузова,

¹⁵ брата сына Авдиилова, сына Гуниина, князь дому отечеств их.

¹⁶ Обиташа в Галааде, в Васане и в весех их и во всех окрестных Саронских, даже до исхода.

¹⁷ Вси сии сочтени быша во дни Иоафама царя Иудина и во дни Иеровоама царя Израилева.

¹⁸ Сынове Рувимовы и Гадовы и полплемене Манассиина (биша) сынове сильни, мужие носяще щиты и мечы и напрязающе луки и научени брани, четыредесять и четыри тысящы и седмь сот и шестьдесят, исходящии на ополчение.

¹⁹ И твориша брань со Агаряны и Итуреаны, и Нафисеаны и Надавеаны,

²⁰ и укрепишася над ними: и предашася в руце их Агаряне и вся обитания их, зане к Богу воззваша во брани, и услыша их, зане уповаша на Него.

²¹ И плениша имения их, велблюдов пятьдесят тысящ, и овец двести пятьдесят тысящ, и ослов две тысящы, и душ человеческих сто тысящ:

²² ранении же мнози падоша, зане (бысть) от Бога брань: и вселишася вместо их даже до преселения.

²³ И полплемене Манассиина вселишася в земли от Васана даже до Ваала Ермоня и Санира и горы Аермонски: и сии в Ливане умножишася.

²⁴ И сии (быша) князи дому отечеств их: Гофер и Иеси, и Елиил и Иеремиа, и Иодуиа и Иедиил, мужие сильни в крепости, мужие именитии, князи по домом отечеств своих.

²⁵ И оставиша Бога отец своих и соблудиша вслед богов людий земли, ихже потреби Бог от лица их:

²⁶ и воздвиже Бог Израилев дух Фула царя Ассирийска и дух Фаглафалласара царя Ассирийска, и пресели Рувима и Гада и полплемене Манассиина, и введе их во Аллан и Иовор, и во Аран и на реку Гозан, даже до дне сего.