Библия на церковно-славянском языке - транслитерация современным русским алфавитом
(1751)

Первая книга Паралипоменон

◄◄ | ◄ | Глава ⚫ | ► | ►►

¹ Рече же Давид: се есть дом Господа Бога, и сей олтарь на всесожжения Израилю.

² И рече Давид собрати вся пришелцы, иже на земли Израилеве, и постави каменосечцев сещи камения тесаная, да созиждется дом Божий.

³ Железо же много на гвозди дверем и вратом на спаяние уготова Давид, и меди множеству не бе числа:

⁴ и древам кедровым не бе числа: яко принесоша Сидоняне и Тиряне древ кедровых множество Давиду.

⁵ И рече Давид: Соломон сын мой детищь млад, дом же еже созидати Господеви в величество высоко, во имя и в славу во всю землю, уготовлю ему. И уготова Давид (всего) множество прежде скончания своего.

⁶ И призва Давид Соломона сына своего и заповеда ему, да созиждет дом Господу Богу Израилеву.

⁷ Рече же Давид к Соломону: чадо, мне бяше в сердцы, да созижду дом имени Господа Бога моего:

⁸ и бысть слово Господне ко мне, глаголющее: многи крови пролиял еси и многи брани сотворил еси, не созиждеши дому имени Моему, яко многи крови пролиял еси на землю предо Мною:

⁹ се, сын родится тебе, сей будет муж покоя, и упокою его от всех враг его окрест, зане Соломон имя ему, и мир и покой дам ему над Израилем во дни его:

¹⁰ той созиждет дом имени Моему, и той будет Мне в сына, и Аз буду ему во отца: и исправлю престол царства его во Израили до века:

¹¹ ныне убо, сыне мой, будет Господь с тобою и благопоспешит, и созиждеши дом Господу Богу твоему, якоже глагола о тебе:

¹² да даст же тебе премудрость и разум Господь и да укрепит тя над Израилем, еже хранити и творити закон Господа Бога твоего:

¹³ тогда благопоспешит, аще сохраниши творити заповеди и судбы, яже повеле Господь Моисеови, (да учит) Израиля: мужайся и крепися, не бойся, ниже устрашися:

¹⁴ и се, аз по убожеству моему уготовах на дом Господень злата талантов сто тысящ, и сребра тысяща тысящ талантов, медь же и железо, емуже несть веса, понеже множество есть, и древа и камения уготовах, и к сим да приложиши:

¹⁵ и с тобою Господь, и приложиши ко множеству творящих дела, художницы, и строителие камений, и древоделе, и всяк мудрец во всяцем деле,

¹⁶ в злате и сребре, в меди и железе несть числа: востани убо и твори, и Господь с тобою.

¹⁷ И повеле Давид всем началником Израилевым, да помогают Соломону сыну его, глаголя:

¹⁸ не Господь ли с вами? И даде вам покой окрест, зане даде в руки вашя живущих на земли, и покорена земля пред Господем и пред людьми Его:

¹⁹ ныне убо дадите сердца ваша и душы вашя еже взыскати Господа Бога вашего, и востаните и созидайте святыню Господу Богу вашему, да внесется кивот завета Господня и сосуды святыя Богови в дом созидаемый имени Господню.