Библия на церковно-славянском языке - транслитерация современным русским алфавитом
(1751)

Первая книга Паралипоменон

◄◄ | ◄ | Глава ⚫ | ► | ►►

¹ Принесоша убо кивот Божий и поставиша его посреде скинии, юже водрузи ему Давид, и принесоша всесожжения и спасителная пред Господем.

² И соверши Давид вознося всесожжения и спасителная, и благослови люди во имя Господне,

³ и раздели всякому мужу Израилску, от мужа даже до жены, мужу хлеб един печеный, (и часть печена мяса,) и пряженый со елеем семидал:

⁴ постави же пред лицем кивота завета Господня от левит, еже служити и возглашати (дела Его), и исповедати и хвалити Господа Бога Израилева:

⁵ Асаф началник, и другий по нем Захариа, Иеиил и Семирамоф, и Иеиил и Маттафиа, и Елиав и Ванеа и Авдедом: Иеиил же во органех и псалтири и гуслех, Асаф же в кимвалех возглашая:

⁶ и Ванеа и Озиил священницы (трубиша) выну в трубы пред кивотом завета Божия.

⁷ В той день устрои Давид в начале хвалити Господа рукою Асафа и братии его.

⁸ Песнь. Исповедайтеся Господеви и призывайте Его во имени Его, знаема сотворите людем начинания Его:

⁹ пойте Ему и воспойте Ему, поведите вся чудеса Его, яже сотвори Господь:

¹⁰ хвалите имя святое Его, да возвеселится сердце ищущее благоволения Его:

¹¹ взыщите Господа и укрепитеся, взыщите лица Его выну:

¹² помяните чудеса Его, яже сотвори, знамения и судбы уст Его,

¹³ семя Израилево, раби Его, сынове Иаковли, избраннии Его.

¹⁴ Той Господь Бог наш, во всей земли судбы Его.

¹⁵ Помянем во век завет Его, слово Его, еже заповедал в тысящы родов,

¹⁶ еже завеща Аврааму, и клятву Свою Исааку:

¹⁷ и постави е Иакову в повеление, Израилю в завет вечен,

¹⁸ глаголя: тебе дам землю Ханааню, уже достояния вашего.

¹⁹ Внегда быти им малым числом, яко умалишася и преселишася в ню,

²⁰ и преидоша от языка в язык и от царствия к людем иным,

²¹ не остави мужа обидети их, и обличи о них цари:

²² не прикасайтеся помазанным Моим, и во пророцех Моих не лукавнуйте.

²³ Воспойте Господеви, вся земля, возвестите от дне на день спасение Его,

²⁴ возвестите во языцех славу Его, во всех людех чудеса Его,

²⁵ яко велий Господь и хвален зело, страшен есть над всеми боги.

²⁶ Яко вси бози языков идоли: Господь же наш небеса сотвори.

²⁷ Слава и величество пред лицем Его, крепость и похвала в месте Его святем.

²⁸ Дадите Господеви, отечествия языков, дадите Господеви славу и крепость,

²⁹ дадите Господеви славу имени Его: возмите дары и принесите пред лице Его, и поклонитеся Господеви во дворех святых Его.

³⁰ Да убоится от лица Его вся земля, да исправится земля и да не подвижится:

³¹ да возвеселятся небеса и да возрадуется земля, и да рекут во языцех: Господь царствует.

³² Да возгласит море и исполнение его, и древа польская, и вся яже на них.

³³ Тогда возвеселятся древа дубравная пред лицем Господним, яко прииде судити земли.

³⁴ Исповедайтеся Господеви, яко благ, яко в век милость Его,

³⁵ и глаголите: спаси ны, Боже, Спасителю наш, и собери нас, и изми нас от язык, да хвалим имя святое Твое, и хвалимся во хвалениих Твоих.

³⁶ Благословен Господь Бог Израилев от века даже и до века. И рекут вси людие: аминь. И восхвалиша Господа.

³⁷ И оставиша тамо пред кивотом завета Господня Асафа и братию его, да служат пред кивотом выну по вся дни:

³⁸ и Авдедом и братия его, шестьдесят осмь: и Авдедом сын Идифунь и Осай (поставлени) во дверники:

³⁹ Садока же священника и братию его священниками пред скиниею Господнею в вышних иже в Гаваоне,

⁴⁰ да возносят всесожжения Господеви на олтари всесожжений выну утро и вечер, и по всем яже писана суть в законе Господни, елика повеле сыном Израилевым рукою Моисеа раба Божия:

⁴¹ и с ними Еман и Идифум и прочии избраннии кийждо званием своим еже хвалити Господа, яко в век милость Его:

⁴² и с ними трубы и кимвалы еже возглашати, и органы пений Божиих: сынове же Идифумли во вратех (стояху).

⁴³ И идоша вси людие кийждо в дом свой, и Давид возвратися, да благословит дом свой.