Библия на церковно-славянском языке - транслитерация современным русским алфавитом
(1751)

Первая книга Паралипоменон

◄◄ | ◄ | Глава ⚫ | ► | ►►

¹ И сотвори себе домы во граде Давидове, и уготова место кивоту Божию, и сотвори ему скинию.

² Тогда рече Давид: не леть есть, (да от всякаго) носится кивот Божий, но токмо от левит, понеже избра их Господь носити кивот Господень и служити Ему даже до века.

³ И собра Давид весь Израиль во Иерусалим, да внесется кивот Божий на место, еже уготова ему.

⁴ И собра Давид сынов Аароновых и левиты:

⁵ от сынов Каафовых Уриил началник и братия его, сто двадесять:

⁶ от сынов Мерариных Асаиа началник и братия его, двести пятьдесят:

⁷ от сынов Герсоних Иоиль началник и братия его, сто тридесять:

⁸ от сынов Елисафаних Семеиа началник и братия его, двести:

⁹ от сынов Хевроновых Елиил началник и братия его, осмьдесят:

¹⁰ от сынов Озиилевых Аминадав началник и братия его, сто дванадесять.

¹¹ И призва Давид Садока и Авиафара священники, и левиты Уриила, Асаиа и Иоиля, и Семеиана и Елиила и Аминадава,

¹² и рече к ним: вы, началницы отечеств левитских, освятитеся вы и братия ваша, и принесите кивот Господа Бога Израилева (на место), идеже уготовах ему:

¹³ яко прежде вам не готовым сущым, раздели Господь Бог наш в нас, яко не взыскахом Его по разсуждению.

¹⁴ И освятишася священницы и левити, да внесут кивот Господа Бога Израилева.

¹⁵ И взяша сынове левитстии кивот Божий, якоже повеле Моисей словом Божиим по писанию, рамены своими на носилех.

¹⁶ И рече Давид началником левитским: поставите братию свою певцев во органех, песнех мусикийских, псалтирех, в гуслех и кимвалех, да возгласят в высоту гласом веселия.

¹⁷ И поставиша левити Емана сына Иоилева: и от братий его Асафа сына Варахиина: и от сынов Мерариных, братий его, Ефана сына Кисеова:

¹⁸ и с ними братия их, втории (чином), Захариа и Озиил, и Семирамоф и Иеиил, и Ананий и Елиав, и Ванеа и Маасиа, и Маттафиа и Елифала, и Макениа и Авдедом, и Иеиил и Озиа, дверницы.

¹⁹ И певцы Еман, Асаф и Ефам в кимвалы медяны (возглашающе) в слышание:

²⁰ Захариа же и Озиил, и Семирамоф и Иеиил, и Ананий и Елиав, и Маасиа и Ванеа со гусльми тайны пояху:

²¹ и Маттафиа и Елифала, и Макениа и Авдедом, и Иеиил и Озиа в кимвалех пояху, еже превзыти:

²² и Хонениа началник левитский, началник пений, зане разумен бе:

²³ и Варахиа и Елкана дверницы кивота:

²⁴ и Совениа и Иосафат, и Нафанаил и Амасиа, и Захариа и Ванай и Елиезер священницы трубящии трубами пред кивотом Божиим: и Авдедом и Иеиа дверницы кивота Божия.

²⁵ И бе Давид и старейшины Израилевы и тысящницы идущии, еже изнести кивот завета Господня из дому Авдедомля с веселием.

²⁶ И бысть егда укрепляше Бог левиты носящыя кивот завета Господня, и пожроша седмь телцев и седмь овнов:

²⁷ Давид же бяше одеян ризою виссонною, и вси левити, носящии кивот завета Господня, певцы же и Хонениа началник песней поющих, на Давиде же бе ефуд виссонный.

²⁸ И весь Израиль провождаше кивот завета Господня с восклицанием и гласом трубным, и с трубами и кимвалы, глашающе в гусли и кифары.

²⁹ И бысть егда прииде кивот завета Господня даже до града Давидова, и Мелхола дщи Сауля смотряше во окно, и виде царя Давида скачуща и играюща и уничижи его в сердцы своем.