Библия на церковно-славянском языке - транслитерация современным русским алфавитом
(1751)

Первая книга Паралипоменон

◄◄ | ◄ | Глава ⚫ | ► | ►►

¹ И сотвори совет Давид (со князи) и тысящники, и сотники и всеми началники,

² и рече Давид ко всему собранию Израилеву: аще угодно вам, и от Господа Бога нашего благопоспешится, да послем к братиям нашым оставшымся во всей земли Израилеве, и с ними священницы и левити, во градех обдержания их, да соберутся к нам,

³ и да принесем кивот Бога нашего к нам, не взыскахом бо его во дни Саули.

⁴ И отвеща все собрание, да тако будет, зане угодно бысть слово сие всем людем.

⁵ И собра Давид всего Израиля от предел Египетских даже до входа Имафова, еже внести кивот Божий от Града Иарима.

⁶ И принесе его Давид: и весь Израиль взыде во град Давидов, иже бяше Иудин, еже вознести тамо кивот Господа Бога седяща на Херувимех, идеже призвано есть имя Его:

⁷ и постави кивот Божий на колесницу нову из дому Аминадавля: Оза же и братия его ведяху колесницу:

⁸ Давид же и весь Израиль играху пред Богом всею силою и в песнех и в гуслех, и псалтири и тимпанех, и кимвалех и в трубах:

⁹ и приидоша ко гумну Хидоню: и простре Оза руку свою, да поддержит кивот, юнец бо уклони его:

¹⁰ и прогневася Господь гневом на Озу и порази его ту, того ради, яко простре руку свою (и прикоснуся) кивоту, и умре ту пред Богом.

¹¹ И оскорбися Давид, яко пресече Господь пресечением Озу, и нарече место то пресечение Озане, даже до дне сего.

¹² И убояся Давид Бога в той день, глаголя: како внесу ко мне кивот Божий?

¹³ И не возврати Давид кивота к себе во град Давидов, но возврати и в дом Аведдара Гефеина:

¹⁴ и пребываше кивот Божий в дому Аведдарове три месяцы, и благослови Бог Аведдара и вся, яже имеяше.