Библия на церковно-славянском языке - транслитерация современным русским алфавитом
(1751)

Первая книга Паралипоменон

◄◄ | ◄ | Глава ⚫ | ► | ►►

¹ И собрася весь Израиль к Давиду в Хеврон, глаголюще: се, кости твоя и плоть твоя мы:

² вчера же и третияго дне, егда еще царствоваше Саул, ты был еси изводяй и вводяй Израиля, и тебе рече Господь Бог твой: ты упасеши люди Моя Израиля, и ты будеши князь над людьми Моими Израилем.

³ И приидоша вси старейшины Израилевы ко царю в Хеврон: и утверди Давид с ними завет в Хевроне пред Господем: и помазаша Давида в царя над Израилем по словеси Господню, (еже глагола) рукою Самуиловою.

⁴ И иде царь Давид и весь Израиль во Иерусалим, сей есть Иевус, идеже бяху Иевусее жителие земли.

⁵ Рекоша же Давиду, иже обиташа в Иевусе: не внидеши семо. И взя Давид крепость Сионю, яже есть град Давидов.

⁶ Рече же Давид: всяк иже убиет Иевусеа в первых, будет князь и воевода. И взыде нань прежде Иоав сын Саруиев и бысть князем.

⁷ И седе Давид во обдержании: сего ради именова е град Давидов.

⁸ И созда град окрест от Маала даже да окружения: Иоав же прочее града сострои: и воева и взя град.

⁹ Преспеваше же Давид идый и растый, и Господь Вседержитель бе с ним.

¹⁰ Сии же князи сильных Давидовых, иже помогаху ему в царстве его со всем Израилем, да царь будет по словеси Господню, над Израилем,

¹¹ и сие число крепких Давидовых: Иесваал сын Ахамань, первый между тридесятми: той извлече мечь свой единожды на триста язвеных во едино время.

¹² И по нем Елеазар, сын Додеа Ахохии: сей бе между треми сильными:

¹³ сей бе с Давидом в Фасодомине, идеже иноплеменницы собрани быша на брань, и бе часть нивы полна ячменя, и людие побегоша от лица иноплеменнича:

¹⁴ и ста посреде части и защити ю, и изби иноплеменники, и сотвори Господь спасение велие (людем Своим).

¹⁵ Снидоша же тии трие от тридесяти князей на камень ко Давиду в пещеру Одолламлю, а полк иноплеменничь стояше во юдоли Гигантов.

¹⁶ Давид же бе тогда в крепости, полк же иноплеменничь бе тогда в Вифлееме.

¹⁷ И возжада Давид и рече: кто напоит мя водою от кладязя Вифлеемска, иже есть во вратех?

¹⁸ И трие тии проторгошася сквозе полк иноплеменничь и почерпоша воду из кладязя, иже в Вифлееме, иже бе во вратех, и взяша и принесоша к Давиду, да пиет. И не восхоте Давид пити ея и возлия ю Господеви

¹⁹ и рече: милостив ми Бог, еже сотворити глагол сей: аще кровь мужей сих испию в душах их, понеже душами своими принесоша. И не восхоте пити ея. Сие сотвориша трие сильнии.

²⁰ И Авесса брат Иоавль, той бе первый в триех: сей извлече мечь свой противу триех сот мужей во един час и уби их, и той бе посреде триех именит:

²¹ от триех между двема преславный, и бе им началник, обаче ко трием первым не достиже.

²² И Ванеа сын Иодаев, сын мужа крепкаго, многа дела его, от Каваслила: той уби двоих Ариилов Моавских, и той сниде и уби льва у кладязя во время снега:

²³ и той уби мужа Египтянина, емуже возраст бе пять лакот, и в руце Египтянина копие яко вратило ткущих: и сниде к нему Ванеа с жезлом, и восхити копие из руки Египтянина и уби его копием его:

²⁴ сия сотвори Ванеа сын Иодаев, и бе именит посреде триех сильных:

²⁵ над тридесятию бе славен сей, а ко трием не достиже: и постави его Давид над отечеством своим.

²⁶ И сильнии сил: Асаил, брат Иоавль, Елеанан, сын Додоев от Вифлеема,

²⁷ Саммоф Аддитянин, Хелкий Афелонин,

²⁸ Орей сын от Киса Фекуйский, Авиезер Анафофский,

²⁹ Совохай Асофийский, Илий Ахойский,

³⁰ Воорай сын Нетофафиев, Еллаф сын Ваинака Нетофафийскаго,

³¹ Ифай сын Ривеин от холма Вениаминя, Ванеа сын Фарафониев,

³² Урий от Неали, Галсавиил Аравефийский,

³³ Азмоф Варсамийский, Елиава Саламийский,

³⁴ Ирас Гоинийский, Ионафан сын Саги Арарийский,

³⁵ Ахиам сын Сахара Арарийскаго, Зифаал сын Орин,

³⁶ Афер Мехурафинский, Ахиа Фелонийский,

³⁷ Асарай Мармелинский, Ноорай сын Авдиев,

³⁸ Иоиль брат Нафанов, Мавар сын Тараиев,

³⁹ Селлик Аммониин, Наарей Вирофин, иже носил оружие Иоава сына Саруиева,

⁴⁰ Ира Иефериин, Гарив Фериин,

⁴¹ Уриа Хетфейский, Вазаф сын Оолиев,

⁴² Адина сын Саха, Рувима князь, и у него тридесять,

⁴³ Анан сын Маахин, и Иосафат Фафаин,

⁴⁴ Озиа Астарофин, Самма и Иеил сынове Хофана Арариина,

⁴⁵ Иедиил сын Саамерин, и Иозае брат его Фосаин,

⁴⁶ Иелиил Маоин, и Арива, и Осоиа сын его, Енаам, и Иефема Моавитский,

⁴⁷ Елиил, и Овид, и Иесиил Месовиев.