Библия на церковно-славянском языке - транслитерация современным русским алфавитом
(1751)

Книга пророка Варуха

◄◄ | ◄ | Глава ⚫ | ► | ►►

¹ Совлецы, Иерусалиме, ризы плачевныя и озлобления твоего и облецыся в лепоту славы, яже тебе бысть от Бога во век.

² Облецыся во одежду правды, яже от Бога, возложи венец на главу твою славы Вечнаго.

³ Бог бо явит всей поднебесней твою светлость.

⁴ Наречется бо от Бога имя твое во веки: мир правды и слава богочестия.

⁵ Востани, Иерусалиме, и стани на высоце, и поглядай на востоки, и виждь собраная чада твоя от восток солнца до запада словом Святаго, радующаяся Божиею памятию.

⁶ Изыдоша бо от тебе пеши ведоми от врагов, введет же я Бог к тебе несомых со славою, яко сыны царства.

⁷ Совеща бо Бог смиритися всяцей горе высоцей и холмом вечным, и юдолиям наполнитися в равень земную, да идет Израиль утвержен славою Божиею.

⁸ Осениша же и дубравы и всяко древо благовонством Израилю, повелением Божиим.

⁹ Предидет бо Бог Израилеви со веселием, светом славы Своея, с помилованием и правдою, яже от Него.