Перевод блаженного Иеронима Стридонского книг Священного Писания на латынь - Vulgata (Вульгата)
(386-405)

Epistula II ad Timotheum

◄◄ | ◄ | Глава ⚫ | ► | ►►

¹ det illi Dominus invenire misericordiam a Domino in illa die et quanta Ephesi ministravit melius tu nosti

² tu ergo fili mi confortare in gratia quae est in Christo Iesu

³ et quae audisti a me per multos testes haec commenda fidelibus hominibus qui idonei erunt et alios docere

⁴ labora sicut bonus miles Christi Iesu

⁵ nemo militans inplicat se negotiis saecularibus ut ei placeat cui se probavit

⁶ nam et qui certat in agone non coronatur nisi legitime certaverit

⁷ laborantem agricolam oportet primum de fructibus accipere

⁸ intellege quae dico dabit enim tibi Dominus in omnibus intellectum

⁹ memor esto Iesum Christum resurrexisse a mortuis ex semine David secundum evangelium meum

¹⁰ in quo laboro usque ad vincula quasi male operans sed verbum Dei non est alligatum

¹¹ ideo omnia sustineo propter electos ut et ipsi salutem consequantur quae est in Christo Iesu cum gloria caelesti

¹² fidelis sermo nam si conmortui sumus et convivemus

¹³ si sustinemus et conregnabimus si negabimus et ille negabit nos

¹⁴ si non credimus ille fidelis manet negare se ipsum non potest

¹⁵ haec commone testificans coram Domino noli verbis contendere in nihil utile ad subversionem audientium

¹⁶ sollicite cura te ipsum probabilem exhibere Deo operarium inconfusibilem recte tractantem verbum veritatis

¹⁷ profana autem inaniloquia devita multum enim proficient ad impietatem

¹⁸ et sermo eorum ut cancer serpit ex quibus est Hymeneus et Philetus

¹⁹ qui a veritate exciderunt dicentes resurrectionem iam factam et subvertunt quorundam fidem

²⁰ sed firmum fundamentum Dei stetit habens signaculum hoc cognovit Dominus qui sunt eius et discedat ab iniquitate omnis qui nominat nomen Domini

²¹ in magna autem domo non solum sunt vasa aurea et argentea sed et lignea et fictilia et quaedam quidem in honorem quaedam autem in contumeliam

²² si quis ergo emundaverit se ab istis erit vas in honorem sanctificatum et utile Domino ad omne opus bonum paratum

²³ iuvenilia autem desideria fuge sectare vero iustitiam fidem caritatem pacem cum his qui invocant Dominum de corde puro

²⁴ stultas autem et sine disciplina quaestiones devita sciens quia generant lites

²⁵ servum autem Domini non oportet litigare sed mansuetum esse ad omnes docibilem patientem

²⁶ cum modestia corripientem eos qui resistunt nequando det illis Deus paenitentiam ad cognoscendam veritatem

²⁷ et resipiscant a diaboli laqueis a quo capti tenentur ad ipsius voluntatem