Перевод блаженного Иеронима Стридонского книг Священного Писания на латынь - Vulgata (Вульгата)
(386-405)

Isaias

◄◄ | ◄ | Глава ⚫ | ► | ►►

¹ et erit fortitudo vestra ut favilla stuppae et opus vestrum quasi scintilla et succendetur utrumque simul et non erit qui extinguat

² verbum quod vidit Isaias filius Amos super Iudam et Hierusalem

³ et erit in novissimis diebus praeparatus mons domus Domini in vertice montium et elevabitur super colles et fluent ad eum omnes gentes

⁴ et ibunt populi multi et dicent venite et ascendamus ad montem Domini et ad domum Dei Iacob et docebit nos vias suas et ambulabimus in semitis eius quia de Sion exibit lex et verbum Domini de Hierusalem

⁵ et iudicabit gentes et arguet populos multos et conflabunt gladios suos in vomeres et lanceas suas in falces non levabit gens contra gentem gladium nec exercebuntur ultra ad proelium

⁶ domus Iacob venite et ambulemus in lumine Domini

⁷ proiecisti enim populum tuum domum Iacob quia repleti sunt ut olim et augures habuerunt ut Philisthim et pueris alienis adheserunt

⁸ repleta est terra argento et auro et non est finis thesaurorum eius

⁹ et repleta est terra eius equis et innumerabiles quadrigae eius et repleta est terra eius idolis opus manuum suarum adoraverunt quod fecerunt digiti eorum

¹⁰ et incurvavit se homo et humiliatus est vir ne ergo dimittas eis

¹¹ ingredere in petram abscondere fossa humo a facie timoris Domini et a gloria maiestatis eius

¹² oculi sublimis hominis humiliati sunt et incurvabitur altitudo virorum exaltabitur autem Dominus solus in die illa

¹³ quia dies Domini exercituum super omnem superbum et excelsum et super omnem arrogantem et humiliabitur

¹⁴ et super omnes cedros Libani sublimes et erectas et super omnes quercus Basan

¹⁵ et super omnes montes excelsos et super omnes colles elevatos

¹⁶ et super omnem turrem excelsam et super omnem murum munitum

¹⁷ et super omnes naves Tharsis et super omne quod visu pulchrum est

¹⁸ et incurvabitur sublimitas hominum et humiliabitur altitudo virorum et elevabitur Dominus solus in die illa

¹⁹ et idola penitus conterentur

²⁰ et introibunt in speluncas petrarum et in voragines terrae a facie formidinis Domini et a gloria maiestatis eius cum surrexerit percutere terram

²¹ in die illa proiciet homo idola argenti sui et simulacra auri sui quae fecerat sibi ut adoraret talpas et vespertiliones

²² et ingredietur fissuras petrarum et cavernas saxorum a facie formidinis Domini et a gloria maiestatis eius cum surrexerit percutere terram

²³ quiescite ergo ab homine cuius spiritus in naribus eius quia excelsus reputatus est ipse