Перевод блаженного Иеронима Стридонского книг Священного Писания на латынь - Vulgata (Вульгата)
(386-405)

Actus Apostolorum

◄◄ | ◄ | Глава ⚫ | ► | ►►

¹ Petrus autem et Iohannes ascendebant in templum ad horam orationis nonam

² et quidam vir qui erat claudus ex utero matris suae baiulabatur quem ponebant cotidie ad portam templi quae dicitur Speciosa ut peteret elemosynam ab introeuntibus in templum

³ is cum vidisset Petrum et Iohannem incipientes introire in templum rogabat ut elemosynam acciperet

⁴ intuens autem in eum Petrus cum Iohanne dixit respice in nos

⁵ at ille intendebat in eos sperans se aliquid accepturum ab eis

⁶ Petrus autem dixit argentum et aurum non est mihi quod autem habeo hoc tibi do in nomine Iesu Christi Nazareni surge et ambula

⁷ et adprehensa ei manu dextera adlevavit eum et protinus consolidatae sunt bases eius et plantae

⁸ et exiliens stetit et ambulabat et intravit cum illis in templum ambulans et exiliens et laudans Dominum

⁹ et vidit omnis populus eum ambulantem et laudantem Deum

¹⁰ cognoscebant autem illum quoniam ipse erat qui ad elemosynam sedebat ad Speciosam portam templi et impleti sunt stupore et extasi in eo quod contigerat illi

¹¹ cum teneret autem Petrum et Iohannem concurrit omnis populus ad eos ad porticum qui appellatur Salomonis stupentes

¹² videns autem Petrus respondit ad populum viri israhelitae quid miramini in hoc aut nos quid intuemini quasi nostra virtute aut pietate fecerimus hunc ambulare

¹³ Deus Abraham et Deus Isaac et Deus Iacob Deus patrum nostrorum glorificavit Filium suum Iesum quem vos quidem tradidistis et negastis ante faciem Pilati iudicante illo dimitti

¹⁴ vos autem sanctum et iustum negastis et petistis virum homicidam donari vobis

¹⁵ auctorem vero vitae interfecistis quem Deus suscitavit a mortuis cuius nos testes sumus

¹⁶ et in fide nominis eius hunc quem videtis et nostis confirmavit nomen eius et fides quae per eum est dedit integram sanitatem istam in conspectu omnium vestrum

¹⁷ et nunc fratres scio quia per ignorantiam fecistis sicut et principes vestri

¹⁸ Deus autem quae praenuntiavit per os omnium prophetarum pati Christum suum implevit sic

¹⁹ paenitemini igitur et convertimini ut deleantur vestra peccata

²⁰ ut cum venerint tempora refrigerii a conspectu Domini et miserit eum qui praedicatus est vobis Iesum Christum

²¹ quem oportet caelum quidem suscipere usque in tempora restitutionis omnium quae locutus est Deus per os sanctorum suorum a saeculo prophetarum

²² Moses quidem dixit quia prophetam vobis suscitabit Dominus Deus vester de fratribus vestris tamquam me ipsum audietis iuxta omnia quaecumque locutus fuerit vobis

²³ erit autem omnis anima quae non audierit prophetam illum exterminabitur de plebe

²⁴ et omnes prophetae a Samuhel et deinceps qui locuti sunt et adnuntiaverunt dies istos

²⁵ vos estis filii prophetarum et testamenti quod disposuit Deus ad patres vestros dicens ad Abraham et in semine tuo benedicentur omnes familiae terrae

²⁶ vobis primum Deus suscitans Filium suum misit eum benedicentem vobis ut convertat se unusquisque a nequitia sua