Бiблiя беларуская - пераклад Василя Сёмухи
(1995, Минск)

Выхад

◄◄ | ◄ | Глава ⚫ | ► | ►►

¹ І наказаў Гасподзь Майсею сказаць:

² у першы месяц, у першы дзень месяца пастаў скінію сходу,

³ і пастаў у ёй каўчэг адкрыцьця, і захіні каўчэг заслонаю;

⁴ і ўнясі стол і пастаў на ім усе рэчы яго, і ўнясі сьвяцільню і пастаў на ёй лампады яе;

⁵ і пастаў залаты ахвярнік, каб дыміць перад каўчэгам адкрыцьця, і павесь заслону на ўваходзе ў скінію;

⁶ і пастаў ахвярнік цэласпаленьня перад уваходам у скінію сходу;

⁷ і пастаў умывальнік паміж скініяй сходу і ахвярнікам і налі ў яго вады;

⁸ і пастаў двор вакол і павесь заслону ў браме двара.

⁹ І вазьмі алею памазаньня, і памаж скінію і ўсё, што ў ёй, і асьвяці яе і ўсе прылады яе, і будзе сьвята;

¹⁰ памаж ахвярнік цэласпаленьня і ўсе прылады яго і асьвяці ахвярнік, і будзе ахвярнік сьвятыня вялікая;

¹¹ і памаж умывальнік і падножжа яго і асьвяці яго.

¹² І прывядзі Аарона і сыноў ягоных да ўваходу ў скінію сходу і абмый іх вадою;

¹³ і апрані Аарона ў сьвяшчэннае адзеньне, і памаж яго, і асьвяці яго, каб ён быў сьвятаром Мне.

¹⁴ І сыноў ягоных прывядзі, і апрані іх у хітоны,

¹⁵ і памаж іх, як памазаў ты бацьку іхняга, каб яны былі сьвятарамі Мне, і памазаньне іх прысьвеціць іх у вечнае сьвятарства ў роды іхнія.

¹⁶ І зрабіў Майсей усё: як загадаў яму Гасподзь, так і зрабіў.

¹⁷ У першы месяц другога года, у першы дзень месяца пастаўлена скінія.

¹⁸ І паставіў Майсей скінію, паклаў падножжы яе, паставіў брусы яе, паклаў жэрдкі і паставіў слупы яе,

¹⁹ напяў покрыва над скініяю і паклаў века паверсе гэтага покрыва, як загадаў Гасподзь Майсею.

²⁰ І ўзяў і паклаў адкрыцьцё ў каўчэг, і ўклаў жэрдкі ў колцы каўчэга, і паклаў века на каўчэг зьверху;

²¹ і ўнёс каўчэг у скінію, і павесіў заслону, і засланіў каўчэг адкрыцьця, як загадаў Гасподзь Майсею.

²² І паставіў стол у скініі сходу на паўночным баку скініі, паза заслонаю,

²³ і расклаў на ім рад хлябоў перад Госпадам, як загадаў Гасподзь Майсею.

²⁴ І паставіў сьвяцільню ў скініі сходу насупраць стала, на паўднёвым баку скініі,

²⁵ і паставіў лампаду перад Госпадам, як загадаў Гасподзь Майсею.

²⁶ І паставіў залаты ахвярнік у скініі сходу перад заслонаю

²⁷ і задыміў на ім пахучае дымленьне, як загадаў Гасподзь Майсею.

²⁸ І павесіў заслону пры ўваходзе ў скінію;

²⁹ і ахвярнік цэласпаленьня паставіў каля ўваходу ў скінію сходу і прынёс на ім цэласпаленьні і ахвяру хлебную, як загадаў Гасподзь Майсею.

³⁰ І паставіў умывальнік паміж скініяй сходу і ахвярнікам і наліў у яго вады для абмываньня,

³¹ і абмывалі зь яго Майсей і Аарон і сыны ягоныя рукі свае і ногі свае;

³² калі яны ўваходзілі ў скінію і падыходзілі да ахавярніка, тады і абмывалі, як загадаў Гасподзь Майсею.

³³ І паставіў двор вакол скініі і ахвярніка і павесіў заслону ў браме двара. І так закончыў Майсей дзею.

³⁴ І ўкрыла воблака скінію сходу.

³⁵ І ня мог Майсей увайсьці ў скінію, бо засланяла яго воблака, і слава Гасподняя напаўняла скінію.

³⁶ Калі падымалася воблака ад скініі, тады выпраўляліся ў дарогу сыны Ізраілевыя падчас усяго падарожжа свайго;

³⁷ калі ж не падымалася воблака, дык і яны не выпараўляліся ў дарогу, пакуль яно не падымалася;

³⁸ бо воблака Гасподняе стаяла над скініяй удзень, і агонь быў уначы ў ёй перад вачыма ўсяго дома Ізраілевага падчас усяго падарожжа іхняга.