Бiблiя беларуская - пераклад Василя Сёмухи
(1995, Минск)

Лiкi

◄◄ | ◄ | Глава ⚫ | ► | ►►

¹ І сказаў Гасподзь Майсею ў пустыні Сінайскай, у скініі сходу, у першы дзень другога месяца, на другі год пасьля выхаду іх зь зямлі Егіпецкай, кажучы:

² палічэце ўсё супольства сыноў Ізраілевых па родах іхніх, па сямействах іхніх, па ліку імёнаў усіх мужчынскага роду пагалоўна:

³ ад дваццаці гадоў і вышэй, усіх здольных ваяваць у Ізраіля, па рушэньнях іхніх палічэце іх - ты і Аарон;

⁴ з вамі павінны быць з кожнага племя па адным чалавеку, які ў родзе сваім галоўны.

⁵ І вось імёны мужоў, якія будуць з вамі: ад Рувіма Еліцур, сын Шэдэураў;

⁶ ад Сымона Шэлумііл, сын Цурышадаеў;

⁷ ад Юды Наасон, сын Амінадаваў;

⁸ ад Ісахара Натанаіл, сын Цуараў;

⁹ ад Завулона Эліяў, сын Хэлонаў;

¹⁰ ад сыноў Язэпа: ад Яфрэма Элішама, сын Аміудаў; ад Манасіі Гамалііл, сын Пэдацураў;

¹¹ ад Веньяміна Авідан, сын Гідэонаў;

¹² ад Дана Ахіязэр, сын Амішадаеў;

¹³ ад Асіра Пагііл, сын Ахранаў;

¹⁴ ад Гада Эліясаф, сын Рэгуілаў;

¹⁵ ад Нэфталіма Ахіра, сын Энанаў.

¹⁶ Гэта - выбраныя мужы супольства, правадыры плямёнаў бацькоў сваіх, галовы тысячаў Ізраілевых.

¹⁷ І ўзяў Майсей і Аарон мужоў гэтых, якія названы паіменна,

¹⁸ і сабралі яны ўсё супольства ў першы дзень другога месяца; і абвясьцілі яны радаводы свае, паводле родаў іхніх, паводле сямействаў іхніх, па ліку імёнаў, ад дваццаці гадоў і вышэй, пагалоўна,

¹⁹ як загадаў Гасподзь Майсею. І зрабіў ён пералік ім у пустыні Сінайскай.

²⁰ І было сыноў Рувіма, першынца Ізраілевага, паводле родаў іхніх, паводле плямёнаў іхніх, паводле сямействаў іхніх, па ліку імёнаў, пагалоўна, усіх мужчынскага полу, ад дваццаці гадоў і вышэй, усіх здольных ваяваць,

²¹ налічана ў калене Рувімавым сорак шэсьць тысяч пяцьсот.

²² Сыноў Сымонавых паводле родаў іхніх, паводле родаў іхніх, паводле сямействаў іхніх, па ліку імёнаў, пагалоўна, усіх мужчынскага полу, ад дваццаці гадоў і вышэй, усіх здольных ваяваць,

²³ налічана ў калене Сымонавым пяцьдзясят дзевяць тысяч трыста.

²⁴ Сыноў Гадавых паводле родаў іхніх, паводле родаў іхніх, паводле сямействаў іхніх, па ліку імёнаў, ад дваццаці гадоў і вышэй, усіх здольных ваяваць,

²⁵ налічана ў калене Гадавым сорак пяць тысяч шэсьцьсот пяцьдзясят.

²⁶ Сыноў Юдавых паводле родаў іхніх, паводле родаў іхніх, паводле сямействаў іхніх, па ліку імёнаў, ад дваццаці гадоў і вышэй, усіх здольных ваяваць,

²⁷ налічана ў калене Юдавым сямсот чатыры тысячы шэсьцьсот.

²⁸ Сыноў Ісахаравых паводле родаў іхніх, паводле родаў іхніх, паводле сямействаў іхніх, па ліку імёнаў, ад дваццаці гадоў і вышэй, усіх здольных ваяваць,

²⁹ налічана ў калене Ісахаравым пяцьдзясят чатыры тысячы чатырыста.

³⁰ Сыноў Завулонавых паводле родаў іхніх, паводле родаў іхніх, паводле сямействаў іхніх, па ліку імёнаў, ад дваццаці гадоў і вышэй, усіх здольных ваяваць,

³¹ налічана ў калене Завулонавым пяцьдзясят сем тысяч чатырыста.

³² Сыноў Язэпавых, сыноў Яфрэмавых, паводле родаў іхніх, паводле родаў іхніх, паводле сямействаў іхніх, па ліку імёнаў, ад дваццаці гадоў і вышэй, усіх здольных ваяваць,

³³ налічана ў калене Яфрэмавым сорак тысяч пяцьсот.

³⁴ Сыноў Манасііных паводле родаў іхніх, паводле родаў іхніх, паводле сямействаў іхніх, па ліку імёнаў, ад дваццаці гадоў і вышэй, усіх здольных ваяваць,

³⁵ налічана ў калене Манасііным трыццаць дзьве тысячы дзьвесьце.

³⁶ Сыноў Веньямінавых паводле родаў іхніх, паводле родаў іхніх, паводле сямействаў іхніх, па ліку імёнаў, ад дваццаці гадоў і вышэй, усіх здольных ваяваць,

³⁷ налічана ў калене Веньямінавым трыццаць пяць тысяч чатырыста.

³⁸ Сыноў Данавых паводле родаў іхніх, паводле родаў іхніх, паводле сямействаў іхніх, па ліку імёнаў, ад дваццаці гадоў і вышэй, усіх здольных ваяваць,

³⁹ налічана ў калене Данавым шэсьцьдзясят дзьве тысячы сямсот.

⁴⁰ Сыноў Асіравых паводле родаў іхніх, паводле родаў іхніх, паводле сямействаў іхніх, па ліку імёнаў, ад дваццаці гадоў і вышэй, усіх здольных ваяваць,

⁴¹ налічана ў калене Асіравым сорак адна тысяча пяцьсот.

⁴² Сыноў Нэфталімавых паводле родаў іхніх, паводле родаў іхніх, паводле сямействаў іхніх, па ліку імёнаў ад дваццаці гадоў і вышэй, усіх здольных ваяваць,

⁴³ налічана ў калене Нэфталімавым пяцьдзясят тры тысячы чатырыста.

⁴⁴ Вось тыя, што ўвайшлі ў пералік, якіх палічыў Майсей і Аарон і правадыры Ізраіля - дванаццаць чалавек, па адным чалавеку з кожнага роду.

⁴⁵ І было ўсіх, што ўвайшлі ў пералік, сыноў Ізраілевых, паводле сямействаў іхніх, ад дваццаці гадоў і вышэй, усіх здольных ваяваць у Ізраіля,

⁴⁶ і было ўсіх, што ўвайшлі ў пералік, шэсьцьсот тры тысячы пяцьсот пяцьдзясят.

⁴⁷ А лявіты паводле пакаленьняў бацькоў іхніх ня былі палічаны сярод іх.

⁴⁸ І наказаў Гасподзь Майсею сказаць:

⁴⁹ Толькі племя Лявіінага ня ўнось у перапіс і ня лічы іх разам з сынамі Ізраіля;

⁵⁰ а даручы лявітам скінію адкрыцьця і ўсе прылады яе і ўсё, што пры ёй: няхай яны носяць скінію і ўсе прылады яе, і служаць пры ёй, і каля скініі няхай ставяць табар свой;

⁵¹ і калі трэба пераносіць скінію, няхай падымаюць яе лявіты, калі трэба спыняцца скініі, няхай ставяць яе лявіты; а калі падступіцца хто староньні, аддадзены будзе сьмерці.

⁵² Сыны Ізраілевыя павінны станавіцца кожны ў табары сваім і кожны пры сваім сьцягу, рушэньнямі сваімі;

⁵³ а лявіты павінны ставіць табар каля скініі адкрыцьця, каб ня было гневу на супольства сыноў Ізраілевых, і будуць лявіты стаяць на варце каля скініі адкрыцьця.

⁵⁴ І зрабілі сыны Ізраілевыя: як загадаў Гасподзь Майсею, так яны і зрабілі.