Бiблiя беларуская - пераклад Василя Сёмухи
(1995, Минск)

Псалтыр

◄◄ | ◄ | Глава ⚫ | ► | ►►

¹ Пахвальная песьня Давідава. Хто жыве пад аслонаю Ўсявышняга, той пакоіцца ў засені Ўсемагутнага,

² кажа Госпаду: прыстанішча мне і Заступніку мой, Божа мой, на Цябе спадзяюся!

³ Ён цябе вызваліць зь сетак лаўца, ад пагібельнай пошасьці;

⁴ пер'ем Сваім Ён цябе ўзасьціць, і пад крыльлем ягоным убясьпечышся; шчыт і аслона - ісьціна Ягоная.

⁵ Не збаішся страху начнога, ні стралы, што ўдзень пралятае,

⁶ ні пошасьці, што ў цемры ходзіць, ані пошасьці, што нішчыць апоўдні.

⁷ Упадзе тысяча побач з табою, і дзесяць тысяч праваруч ад цябе; але да цябе не наблізіцца:

⁸ толькі глядзецьмеш вачыма тваімі і ўбачыш помсту бязбожнікам.

⁹ Бо сказаў Ты: Гасподзь - надзея мая; Усявышняга выбраў ты прыстанішчам тваім;

¹⁰ ліха цябе не спаткае, і пошасьць жытла твайго не зачэпіць;

¹¹ бо анёлам Сваім наказвае пра цябе - ахоўваць цябе на ўсіх дарогах тваіх,

¹² і на руках цябе панясуць, каб не спатыкнуўся ты аб камень нагою тваёю;

¹³ на асьпіда і васіліска наступіш і патопчаш ільва і дракона.

¹⁴ "За тое, што ён палюбіў Мяне, уратую яго; абараню яго, бо ён спазнаў імя Маё.

¹⁵ Пакліча Мяне і пачую яго: зь ім Я ў жалобе, вызвалю яго, і праслаўлю яго;

¹⁶ даўжынёю дзён напоўню яго, і пакажу яму выратаваньне Маё".