Бiблiя беларуская - пераклад Василя Сёмухи
(1995, Минск)

Псалтыр

◄◄ | ◄ | Глава ⚫ | ► | ►►

¹ Псальма Давідава, калі ён быў у пустыні Юдэйскай.

² Божа! Ты Бог мой, Цябе я шукаю ад золку; Цябе прагне душа мая, па Табе маё цела тужыць у зямлі пустой, высахлай і бязводнай,

³ каб бачыць сілу Тваю і славу Тваю, як бачыў Цябе ў сьвятыні:

⁴ бо ласка Твая лепшая за жыцьцё. Уславяць вусны мае Цябе.

⁵ Так дабраслаўлю Цябе ў жыцьці маім; у імя Тваё рукі мае падыму.

⁶ Як лоем і алеем душа мая насычаецца, і радасным голасам вусны мае Цябе славяць,

⁷ калі ўспамінаю Цябе я на ложку маім, думаю пра Цябе ў часіну начную,

⁸ бо Ты дапамога мая, і ў цяні крылаў Тваіх я парадуюся;

⁹ Душа мая да Цябе прыляпілася; правіца Твая трымае мяне.

¹⁰ А тыя, што шукаюць пагібелі душы маёй, сыдуць у апраметную зямлі;

¹¹ паб'юць іх сілаю меча; стануць здабычаю лісаў;

¹² а цар усьцешыцца ў Богу, будзе ўслаўлены кожны, хто Яму прысягае, бо замкнуцца вусны ў тых, што гавораць няпраўду.