Бiблiя беларуская - пераклад Василя Сёмухи
(1995, Минск)

Псалтыр

◄◄ | ◄ | Глава ⚫ | ► | ►►

¹ Псальма Давідава. Заступіся, Госпадзе, перад тымі, хто судзіцца са мною, зваюй тых, хто ваюе мяне;

² вазьмі шчыт і латы, і ўстань на дапамогу мне;

³ агалі меч, і заступі дарогу тым, што гоняць мяне; скажы душы маёй: Я - ратунак твой!

⁴ Хай пасаромяцца і паганьбуюцца тыя, хто цікуе душу маю, хай адступяцца і пакрыюцца ганьбаю тыя, хто шкоду мне намышляе;

⁵ хай будуць яны, як пыл на ветры, і анёл Гасподні хай праганяе іх.

⁶ Хай будзе шлях іхні цёмны і коўзкі, і анёл Гасподні няхай гоніць іх,

⁷ бо яны бязь віны схавалі мне яму - сетку сваю; выкапалі яе на бязьвінную душу маю!

⁸ Хай спадзе на яго пагібель нянаджаная, і сетка ягоная, якую ён схаваў на мяне, хай яго самога і ўловіць; хай у яе і ўпадзе на пропадзь сваю.

⁹ А душа мая зарадуецца ў Госпадзе; усьцешыцца збавеньнем ад Яго.

¹⁰ Усе косткі мае скажуць: "Госпадзе! хто да Цябе падобны? Ты ратуеш слабога ад дужага, беднага і ўбогага ад зьдзірцы ягонага?"

¹¹ Паўсталі на мяне сьведкі няправедныя: чаго я ня ведаю, - выпытваюць у мяне;

¹² плацяць мне злом за дабро, сіроцтвам душы маёй.

¹³ А як былі хварэлі яны, я апранаўся ў вярэту, душу маю таміў пастом, і малітва мая вярталася ў нетру маю.

¹⁴ Я рабіў, быццам сябру, як брату майму; я хадзіў смутны, панурыўшы голаў, як бы аплакваючы маці.

¹⁵ А калі я спатыкаўся, яны радаваліся і зьбіраліся; зьбіраліся агуднікі супроць мяне, ня ведаю завошта, ганілі мяне, і не пераставалі;

¹⁶ з крывадушнымі пакепнікамі скрыгаталі на мяне зубамі сваімі.

¹⁷ Госпадзе! ці доўга будзеш глядзець на гэта? Адвядзі душу маю ад злачынстваў іхніх, ад ільвоў - самотную душу маю!

¹⁸ Я праслаўлю Цябе на сходзе вялікім, сярод процьмы народу ўсхвалю Цябе,

¹⁹ каб не збыткавалі зь мяне тыя, што ваявалі супроць мяне несправядліва, і не перамігваліся вачыма тыя, што ненавідзяць мяне бязьвіннага;

²⁰ бо не за мір прамаўляюць яны, а супроць мірных на землях плятуць аблудныя намыслы;

²¹ разьзьяўляюць на мяне вусны свае; кажуць: "добра! добра! бачыла наша вока".

²² Ты бачыў, Госпадзе, не змаўчы; Госпадзе! не аддаляйся ад мяне.

²³ Устань, прачніся на суд мой, на цяжбіну маю, Божа мой і Госпадзе мой!

²⁴ Судзі мяне па праўдзе Тваёй, Госпадзе, Божа мой, і хай ня радуюцца яны празь мяне;

²⁵ хай ня кажуць у сэрцы сваім: "добра! добра!, нам да душы!" Хай ня кажуць: "мы праглынулі яго".

²⁶ Няхай пасаромяцца і паганьбуюцца ўсе, хто радуецца зь няшчасьця майго; хай убяруцца ў сорам і ганьбу, хай фанабэрацца над мною.

²⁷ Няхай радуюцца і весяляцца, хто маёй слушнасьці прагне, і няхай кажуць заўсёды: "хай праславіцца Гасподзь, Які зычыць міру рабу Свайму!"

²⁸ І язык мой будзе абвяшчаць Тваю праўду і хвалу Табе дзень у дзень.