Бiблiя беларуская - пераклад Василя Сёмухи
(1995, Минск)

Псалтыр

◄◄ | ◄ | Глава ⚫ | ► | ►►

¹ Слаўце Госпада; заклікайце імя Ягонае; абвяшчайце ў народах дзеі Ягоныя.

² Сьпявайце Яму і грайце Яму; раскажэце пра ўсе цуды Ягоныя.

³ Хвалецеся імем Ягоным сьвятым; хай цешыцца сэрца ў тых, хто шукае Госпада.

⁴ Шукайце Госпада і сілы Ягонай, шукайце аблічча Ягонага заўсёды.

⁵ Згадвайце цуды Ягоныя, якія ўчыніў, азнакі Ягоныя і суд вуснаў Ягоных,

⁶ вы, семя Абрагамавае, рабы Ягоныя, сыны Якава, выбранцы Ягоныя.

⁷ Ён Гасподзь Бог наш; па ўсёй зямлі суды Ягоныя.

⁸ Вечна Ён памятае Свой запавет, слова, якое запавядаў тысячам родаў,

⁹ якое запавядаў Абрагаму, і клятву сваю Ісааку,

¹⁰ і паставіў тое Якаву законам, і Ізраілю запаветам вечным,

¹¹ кажучы: табе дам зямлю Ханаанскую як часьціну спадчыны вашай.

¹² Калі іх было яшчэ лікам мала, вельмі мала, і былі яны прыхадні ў ёй,

¹³ і пераходзілі ад народу да народу, з царства да іншага племя,

¹⁴ нікому не дазваляў крыўдзіць іх, і за іх цароў дакараў:

¹⁵ "не дакранайцеся да памазанцаў Маіх, і прарокам Маім не рабеце зла".

¹⁶ І наклікаў голад на зямлю; кожнае хлебнае сьцябло паламаў.

¹⁷ Паслаў перад імі чалавека: у рабы быў прададзены Язэп.

¹⁸ Скавалі аковамі ногі яму, у жалеза ўвайшла душа ягоная,

¹⁹ пакуль спраўдзілася слова Ягонае: слова Гасподняе выпрабавала яго.

²⁰ Паслаў цар, і разьвязалі яго; уладар народаў, і вызваліў яго.

²¹ Паставіў яго гаспадаром над домам сваім і ўпраўцам над усім валоданьнем сваім,

²² каб ён настаўляў валадароў ягоных паводле сваёй душы і старэйшын ягоных вучыў мудрасьці.

²³ Тады прыйшоў Ізраіль у Егіпет, і перасяліўся Якаў у зямлю Хамаву,

²⁴ і вельмі размножыў Бог народ Свой, і зрабіў яго мацнейшым за ворагаў ягоных.

²⁵ Абудзіў у сэрцы іхнім нянавісьць супроць народу Ягонага і хітрасьць супроць рабоў Ягоных.

²⁶ Паслаў Майсея, раба Свайго, Аарона, якога абраў.

²⁷ Яны паказалі сярод іх слова азнакаў Ягоных і дзівосы Ягоныя ў зямлі Хамавай.

²⁸ Паслаў цемру, і зрабіў морак, і не зрабілі супору слову Ягонаму.

²⁹ Ператварыў іхнюю ваду ў кроў, і замарыў рыбу іхнюю.

³⁰ Зямля іхняя ўрадзіла шмат жаб нават у спальні цароў іхніх.

³¹ Ён сказаў, і прыйшлі розныя насякомыя, воды ва ўсе іхнія межы.

³² Замест дажджу паслаў на іх град, вагонь пякучы на зямлю іхнюю.

³³ І пабіў вінаград іхні і смакоўніцы іхнія, і паваліў дрэвы ў межах іхніх.

³⁴ Сказаў, і прыйшла саранча, і безьліч вусеняў;

³⁵ і паелі ўсю траву на зямлі іхняй, і паелі плады на палях іхніх.

³⁶ І забіў кожнага першынца ў зямлі іхняй, пачаткі ўсёй сілы іхняй.

³⁷ І вывеў іх з срэбрам і золатам, і ня было ў іхніх плямёнах хворага.

³⁸ Узрадаваўся Егіпет выхаду іхняму; бо страх ад іх напаў на яго.

³⁹ Прасьцёр ім хмару як заслону і вагонь, каб сьвяціў ім ноччу.

⁴⁰ Прасілі, і Ён паслаў перапёлак, і хлебам нябесным карміў іх.

⁴¹ Раскалоў камень, і пацяклі воды, пацяклі ракою па мясьцінах сухіх,

⁴² бо ўзгадаў Ён сьвятое слова Сваё да Абрагама, раба Свайго,

⁴³ і вывеў народ Свой у радасьці, выбранцаў Сваіх у весялосьці:

⁴⁴ і даў ім землі народаў, і перанялі яны працу людзкую,

⁴⁵ каб трымаліся пастановаў Ягоных і законы Ягоныя захоўвалі. Алілуя!