Святое Дабравесце (па Беларуску) пераклад Бiблейскай камiсii БПЦ МП

Святое Дабравесце паводле Марка

◄◄ | ◄ | Глава ⚫ | ► | ►►

¹ I калi выходзiў Ён з храма, кажа Яму адзiн з вучняў Яго: Настаўнiк! паглядзi, якое каменне i якiя будынкi!

² I сказаў Iiсус яму ў адказ: бачыш гэтыя вялiкiя будынкi? Не застанецца тут каменя на каменi, якi не будзе зруйнаваны.

³ I калi сядзеў Ён на гары Елеонскай насупраць храма, пыталiся асобна ў Яго Пётр i Iакаў, i Iаан, i Андрэй:

⁴ скажы нам, калi гэта будзе, i якое знаменне, калi павiнна ўсё гэта збыцца?

⁵ Iiсус жа, адказваючы iм, пачаў гаварыць: сцеражыцеся, каб хто не ўвёў вас у зман.

⁶ Бо многiя прыдуць пад iмем Маiм, кажучы, што гэта Я, i многiх увядуць у зман.

⁷ Калi ж пачуеце пра войны i чуткi аб войнах, не жахайцеся, бо павiнна так быць, але гэта яшчэ не канец.

⁸ Бо паўстане народ на народ, i царства на царства; i будуць землятрусы месцамi, i будуць галады i смуты. Гэта пачатак пакут.

⁹ Вы ж самі сцеражыцеся, бо вас будуць аддаваць на судзiлiшчы, i бiць у сiнагогах, i перад правіцелямi i царамi паставяць вас да Мяне, дзеля сведчання iм.

¹⁰ I ва ўсiх народах перш павiнна быць прапаведана Евангелле.

¹¹ Калi ж павядуць вас, каб выдаць, не турбуйцеся загадзя, што вам сказаць, i не абдумвайце; але што дадзена будзе вам у тую гадзiну, тое кажыце, бо не вы будзеце гаварыць, а Дух Святы.

¹² І выдасць брат брата на смерць, i бацька дзiця, i паўстануць дзеці на бацькоў i заб’юць iх.

¹³ I будзеце зненавiджаныя ўсiмi за iмя Маё; але хто выцерпiць да канца, той збаўлены будзе.

¹⁴ Калi ж убачыце мярзоту спусташэння, пра якую сказана Даніілам прарокам, якая паўстане там, дзе не павiнна быць, - хто чытае, няхай разумее, - тады тыя, хто ў Iудзеi, няхай бягуць у горы;

¹⁵ а хто на даху, няхай не спускаецца ў дом i не ўваходзiць узяць што-небудзь з дома свайго;

¹⁶ i хто ў полi, няхай не вяртаецца назад, каб узяць вопратку сваю.

¹⁷ Гора ж цяжарным i тым, што кормяць грудзьмi ў тыя днi!

¹⁸ Малiцеся ж, каб не здарылiся ўцёкi вашы зiмою.

¹⁹ Бо тыя днi будуць ліхам, якога не было ад пачатку стварэння, што стварыў Бог, аж да сёння, i не будзе.

²⁰ I калi б Гасподзь не скарацiў тых дзён, то не ўратавалася б нiякая плоць; але дзеля абраных, якiх выбраў Ён, скараціў тыя днi.

²¹ І тады, калi хто скажа вам: вось, тут Хрыстос, або: вось, там, - не верце.

²² Бо паўстануць iлжэхрысты ды лжэпрарокi, i дадуць знаменнi i цуды, каб увесцi ў зман, калi магчыма, i абраных.

²³ Вы ж сцеражыцеся; вось, Я наперад сказаў вам ўсё.

²⁴ Але ў тыя днi, пасля ліха таго, сонца памеркне, i месяц не дасць святла свайго,

²⁵ i зоркi з неба будуць падаць, i сiлы, што ў нябёсах, зрушацца.

²⁶ I тады ўбачаць Сына Чалавечага, Якi прыйдзе на воблаках з сiлаю многаю i славаю.

²⁷ I тады пашле Ён Ангелаў Сваiх i збярэ абраных Сваiх ад чатырох вятроў, ад краю зямлi да краю неба.

²⁸ Ад смакоўнiцы навучыцеся параўнаннем: калi голле яе ўжо мякчэе i пускае лiсце, ведаеце, што блiзка лета.

²⁹ Так i вы, калi ўбачыце, што гэта збываецца, ведайце, што блiзка, пры дзвярах.

³⁰ Праўду кажу вам: не мiне род гэты, як усё гэта будзе.

³¹ Неба i зямля мiнуць, а словы Мае не мiнуць.

³² Пра дзень жа той цi гадзiну нiхто не ведае, нi Ангелы на небе, нi Сын, - толькi Айцец.

³³ Глядзiце, будзьце пiльныя і малiцеся, бо не ведаце, калi настане той час,

³⁴ падобна як чалавек, ад’язджаючы, пакiнуў дом свой i даў слугам сваiм уладу, i кожнаму сваю працу, а брамнiку загадаў, каб быў пiльны.

³⁵ Дык будзьце пiльныя; бо не ведаеце, калi прыйдзе гаспадар дома: увечары, цi апоўначы, цi як запяюць пеўні, цi ранiцаю;

³⁶ каб, прыйшоўшы неспадзявана, не застаў вас у сне.

³⁷ А што вам кажу, усiм кажу: будзьце пiльныя.