Перевод блаженного Иеронима Стридонского книг Священного Писания на латынь - Vulgata (Вульгата)
(386-405)

Sapientia

◄◄ | ◄ | Глава ⚫ | ► | ►►

¹ impii autem manibus et verbis arcessierunt illam et aestimantes illam amicam defluxerunt et sponsionem posuerunt ad illam quoniam digni sunt qui sunt ex parte illius

² dixerunt enim apud se cogitantes non recte exiguum et cum taedio est tempus vitae nostrae et non est refrigerium in fine hominis et non est qui agnitus sit reversus ab inferis

³ quia ex nihilo nati sumus et post hoc erimus tamquam non fuerimus quoniam fumus afflatus est in naribus nostris et sermo scintillae ad commovendum cor nostrum

⁴ quia extincta cinis erit corpus et spiritus diffundetur tamquam mollis aer et transiet vita nostra tamquam vestigium nubis et sicut nebula dissolvetur quae fugata est a radiis solis et a calore illius adgravata

⁵ et nomen nostrum oblivionem accipiet per tempus et nemo memoriam habebit operum nostrorum

⁶ umbrae enim transitus est tempus nostrum et non est reversio finis nostri quoniam consignata est et nemo revertetur

⁷ venite ergo et fruamur bonis quae sunt et utamur creaturam tamquam in iuventute celeriter

⁸ vino pretioso et unguentis nos impleamus et non praetereat nos flos temporis

⁹ coronemus nos rosis antequam marcescant nullum pratum sit quod non pertranseat luxuria nostra

¹⁰ ubique relinquamus signa laetitiae quoniam haec est pars nostra et haec est sors

¹¹ opprimamus pauperem iustum et non parcamus viduae nec veterani revereamur canos multi temporis

¹² sit autem fortitudo nostra lex iniustitiae quod infirmum est enim inutile invenitur

¹³ circumveniamus ergo iustum quoniam inutilis est nobis et contrarius est operibus nostris et inproperat nobis peccata legis et diffamat in nos peccata disciplinae nostrae

¹⁴ promittit scientiam Dei se habere et filium Dei se nominat

¹⁵ factus est nobis in traductionem cogitationum nostrarum

¹⁶ gravis est nobis etiam ad videndum quoniam dissimilis est aliis vita illius et inmutatae sunt viae eius

¹⁷ tamquam nugaces aestimati sumus ab illo et abstinet se a viis nostris tamquam ab inmunditiis et praefert novissima iustorum et gloriatur patrem Deum se habere

¹⁸ videamus ergo si sermones illius veri sunt et temptemus quae ventura sunt illi et sciemus quae erunt novissima illius

¹⁹ si enim est verus filius Dei suscipiet illum et liberabit eum de manu contrariorum

²⁰ contumelia et tormento interrogemus eum ut sciamus reverentiam illius et probemus patientiam ipsius

²¹ morte turpissima condemnemus illum erit enim ei respectus ex sermonibus illius

²² haec cogitaverunt et erraverunt excaecavit enim illos malitia eorum

²³ et nescierunt sacramenta Dei neque mercedem speraverunt iustitiae nec iudicaverunt honorem animarum sanctarum

²⁴ quoniam Deus creavit hominem inexterminabilem et ad imaginem suae similitudinis fecit illum

²⁵ invidia autem diaboli mors introivit in orbem terrarum

²⁶ imitantur autem illum qui sunt ex parte illius