Перевод блаженного Иеронима Стридонского книг Священного Писания на латынь - Vulgata (Вульгата)
(386-405)

Numeri

◄◄ | ◄ | Глава ⚫ | ► | ►►

¹ fecerunt ergo filii Israhel iuxta omnia quae praeceperat Dominus Mosi

² locutusque est Dominus ad Mosen et Aaron dicens

³ singuli per turmas signa atque vexilla et domos cognationum suarum castrametabuntur filiorum Israhel per gyrum tabernaculi foederis

⁴ ad orientem Iudas figet tentoria per turmas exercitus sui eritque princeps filiorum eius Naasson filius Aminadab

⁵ et omnis de stirpe eius summa pugnantium septuaginta quattuor milia sescentorum

⁶ iuxta eum castrametati sunt de tribu Isachar quorum princeps fuit Nathanahel filius Suar

⁷ et omnis numerus pugnatorum eius quinquaginta quattuor milia quadringenti

⁸ in tribu Zabulon princeps fuit Heliab filius Helon

⁹ omnis de stirpe eius exercitus pugnatorum quinquaginta septem milia quadringenti

¹⁰ universi qui in castris Iudae adnumerati sunt fuerunt centum octoginta sex milia quadringenti et per turmas suas primi egredientur

¹¹ in castris filiorum Ruben ad meridianam plagam erit princeps Elisur filius Sedeur

¹² et cunctus exercitus pugnatorum eius qui numerati sunt quadraginta sex milia quingenti

¹³ iuxta eum castrametati sunt de tribu Symeon quorum princeps fuit Salamihel filius Surisaddai

¹⁴ et cunctus exercitus pugnatorum eius qui numerati sunt quinquaginta novem milia trecenti

¹⁵ in tribu Gad princeps fuit Heliasaph filius Duhel

¹⁶ et cunctus exercitus pugnatorum eius qui numerati sunt quadraginta quinque milia sescenti quinquaginta

¹⁷ omnes qui recensiti sunt in castris Ruben centum quinquaginta milia et mille quadringenti quinquaginta per turmas suas in secundo loco proficiscentur

¹⁸ levabitur autem tabernaculum testimonii per officia Levitarum et turmas eorum quomodo erigetur ita et deponetur singuli per loca et ordines suos proficiscentur

¹⁹ ad occidentalem plagam erunt castra filiorum Ephraim quorum princeps fuit Helisama filius Ammiud

²⁰ cunctus exercitus pugnatorum eius qui numerati sunt quadraginta milia quingenti

²¹ et cum eis tribus filiorum Manasse quorum princeps fuit Gamalihel filius Phadassur

²² cunctus exercitus pugnatorum eius qui numerati sunt triginta duo milia ducenti

²³ in tribu filiorum Beniamin princeps fuit Abidan filius Gedeonis

²⁴ et cunctus exercitus pugnatorum eius qui recensiti sunt triginta quinque milia quadringenti

²⁵ omnes qui numerati sunt in castris Ephraim centum octo milia centum per turmas suas tertii proficiscentur

²⁶ ad aquilonis partem castrametati sunt filii quorum princeps fuit Ahiezer filius Amisaddai

²⁷ cunctus exercitus pugnatorum eius qui numerati sunt sexaginta duo milia septingenti

²⁸ iuxta eum fixere tentoria de tribu Aser quorum princeps fuit Phegihel filius Ochran

²⁹ cunctus exercitus pugnatorum eius qui numerati sunt quadraginta milia et mille quingenti

³⁰ de tribu filiorum Nepthalim princeps fuit Ahira filius Henan

³¹ cunctus exercitus pugnatorum eius quinquaginta tria milia quadringenti

³² omnes qui numerati sunt in castris fuerunt centum quinquaginta septem milia sescenti et novissimi proficiscentur

³³ hic numerus filiorum Israhel per domos cognationum suarum et turmas divisi exercitus sescenta tria milia quingenti quinquaginta

³⁴ Levitae autem non sunt numerati inter filios Israhel sic enim praecepit Dominus Mosi

³⁵ feceruntque filii Israhel iuxta omnia quae mandaverat Dominus castrametati sunt per turmas suas et profecti per familias ac domos patrum suorum