Перевод блаженного Иеронима Стридонского книг Священного Писания на латынь - Vulgata (Вульгата)
(386-405)

Evangelium secundum Marcum

◄◄ | ◄ | Глава ⚫ | ► | ►►

¹ at ille egressus coepit praedicare et diffamare sermonem ita ut iam non posset manifeste in civitatem introire sed foris in desertis locis esse et conveniebant ad eum undique

² et iterum intravit Capharnaum post dies

³ et auditum est quod in domo esset et convenerunt multi ita ut non caperet neque ad ianuam et loquebatur eis verbum

⁴ et venerunt ferentes ad eum paralyticum qui a quattuor portabatur

⁵ et cum non possent offerre eum illi prae turba nudaverunt tectum ubi erat et patefacientes submiserunt grabattum in quo paralyticus iacebat

⁶ cum vidisset autem Iesus fidem illorum ait paralytico fili dimittuntur tibi peccata

⁷ erant autem illic quidam de scribis sedentes et cogitantes in cordibus suis

⁸ quid hic sic loquitur blasphemat quis potest dimittere peccata nisi solus Deus

⁹ quo statim cognito Iesus spiritu suo quia sic cogitarent intra se dicit illis quid ista cogitatis in cordibus vestris

¹⁰ quid est facilius dicere paralytico dimittuntur tibi peccata an dicere surge et tolle grabattum tuum et ambula

¹¹ ut autem sciatis quia potestatem habet Filius hominis in terra dimittendi peccata ait paralytico

¹² tibi dico surge tolle grabattum tuum et vade in domum tuam

¹³ et statim ille surrexit et sublato grabatto abiit coram omnibus ita ut admirarentur omnes et honorificarent Deum dicentes quia numquam sic vidimus

¹⁴ et egressus est rursus ad mare omnisque turba veniebat ad eum et docebat eos

¹⁵ et cum praeteriret vidit Levin Alphei sedentem ad teloneum et ait illi sequere me et surgens secutus est eum

¹⁶ et factum est cum accumberet in domo illius multi publicani et peccatores simul discumbebant cum Iesu et discipulis eius erant enim multi qui et sequebantur eum

¹⁷ et scribae et Pharisaei videntes quia manducaret cum peccatoribus et publicanis dicebant discipulis eius quare cum publicanis et peccatoribus manducat et bibit magister vester

¹⁸ hoc audito Iesus ait illis non necesse habent sani medicum sed qui male habent non enim veni vocare iustos sed peccatores

¹⁹ et erant discipuli Iohannis et Pharisaei ieiunantes et veniunt et dicunt illi cur discipuli Iohannis et Pharisaeorum ieiunant tui autem discipuli non ieiunant

²⁰ et ait illis Iesus numquid possunt filii nuptiarum quamdiu sponsus cum illis est ieiunare quanto tempore habent secum sponsum non possunt ieiunare

²¹ venient autem dies cum auferetur ab eis sponsus et tunc ieiunabunt in illa die

²² nemo adsumentum panni rudis adsuit vestimento veteri alioquin aufert supplementum novum a veteri et maior scissura fit

²³ et nemo mittit vinum novellum in utres veteres alioquin disrumpet vinum utres et vinum effunditur et utres peribunt sed vinum novum in utres novos mitti debet

²⁴ et factum est iterum cum sabbatis ambularet per sata et discipuli eius coeperunt praegredi et vellere spicas

²⁵ Pharisaei autem dicebant ei ecce quid faciunt sabbatis quod non licet

²⁶ et ait illis numquam legistis quid fecerit David quando necessitatem habuit et esuriit ipse et qui cum eo erant

²⁷ quomodo introiit in domum Dei sub Abiathar principe sacerdotum et panes propositionis manducavit quos non licet manducare nisi sacerdotibus et dedit eis qui cum eo erant

²⁸ et dicebat eis sabbatum propter hominem factum est et non homo propter sabbatum

²⁹ itaque dominus est Filius hominis etiam sabbati