Перевод блаженного Иеронима Стридонского книг Священного Писания на латынь - Vulgata (Вульгата)
(386-405)

Machabaeorum II

◄◄ | ◄ | Глава ⚫ | ► | ►►

¹ appellavit autem Neemias hoc Nepthar quod interpretatur purificatio vocatur autem apud plures Nephi

² invenitur autem in descriptionibus Hieremiae prophetae quod iussit accipere ignem eos qui transmigrabantur ut significatum est et ut mandavit transmigratis

³ et dedit illis legem ne obliviscerentur praecepta Domini et ut non exerrarent mentibus videntes simulacra aurea et argentea et ornamenta eorum

⁴ et alia huiuscemodi dicens hortabatur ne legem amoverent a corde suo

⁵ erat autem in ipsa scriptura quomodo tabernaculum et arcam iussit propheta divino responso ad se facto comitari secum usquequo exiit in montem in quo Moses ascendit et vidit Dei hereditatem

⁶ et veniens ibi Hieremias invenit locum speluncae et tabernaculum et arcam et altare incensi intulit illuc et ostium obstruxit

⁷ et accesserunt quidam simul qui sequebantur ut notarent sibi locum et non potuerunt invenire

⁸ ut autem cognovit Hieremias culpans illos dixit quod ignotus erit locus donec congreget Deus congregationem populi et propitius fiat

⁹ et tunc Dominus ostendet haec et apparebit maiestas Domini et nubes erit sicut et Mosi manifestabatur et sicut cum Salomon petiit ut locus sanctificaretur magno Deo manifestabat haec

¹⁰ et ut sapientiam habens obtulit sacrificium dedicationis et consummationis templi

¹¹ sicut et Moses orabat ad Dominum et descendit ignis de caelo et consumpsit holocaustum

¹² et dixit Moses eo quod non sit mundatum quod erat pro peccato et consumptum est

¹³ similiter et Salomon octo diebus celebravit dedicationem

¹⁴ inferebantur autem in descriptionibus et commentariis Neemiae haec eadem et ut construens bibliothecam congregavit de regibus libros et prophetarum et David et epistulas regum et de donariis

¹⁵ similiter autem et Iudas ea quae didicerat per bellum quod nobis acciderat congregavit omnia et sunt apud nos

¹⁶ si ergo desiderastis haec mittite qui perferant vobis

¹⁷ acturi itaque purificationem scripsimus vobis bene igitur facietis si egeritis hos dies

¹⁸ Deus autem qui liberavit populum suum et reddidit hereditatem omnibus et regnum et sacerdotium et sanctificationem

¹⁹ sicut promisit in lege speramus quod cito nostri miserebitur et congregabit de sub caelo in locum sanctum

²⁰ eripuit enim nos de magnis periculis et locum purgavit

²¹ de Iuda vero Macchabeo et fratribus eius et de templi magni purificatione et de arae dedicatione

²² sed et de proeliis quae pertinent ad Antiochum Nobilem et filium eius Eupatorem

²³ et de inluminationibus quae de caelo factae sunt ad eos qui pro Iudaeis fortiter fecerunt ita ut universam regionem cum pauci essent vindicarent et barbaram multitudinem fugarent

²⁴ et famosissimum in toto orbe templum recuperarent et civitatem liberarent ut leges quae abolendae erant restituerentur Domino cum omni tranquillitate propitio facto illis

²⁵ itemque ab Iasone Cyreneo quinque libris conprehensa temptavimus nos uno volumine breviare

²⁶ considerantes enim multitudinem librorum et difficultatem volentibus adgredi narrationes historiarum propter multitudinem rerum

²⁷ curavimus volentibus quidem legere ut esset animi oblectatio studiosis vero ut facile possint memoriae commendare omnibus autem legentibus utilitas conferatur

²⁸ et nobis quidem ipsis qui opus hoc breviandi causa suscepimus non facilem laborem immo vero negotium plenum vigiliarum et sudoris adsumpsimus

²⁹ sicut hii qui praeparant convivium et quaerunt aliorum voluntati parere propter multorum gratiam libenter laborem sustinemus

³⁰ veritatem quidem de singulis auctori concedentes ipsi autem secundum datam formam brevitati studentes

³¹ sicut enim novae domus architecto de universa structura curandum est ei vero qui pingere conatur quae apta sunt ad ornatum exquirenda sunt ita aestimandum est et in nobis

³² etenim intellectum colligere et ordinare sermonem et curiosius partes singulas quasque disquaerere historiae congruit auctori

³³ brevitatem vero dictionis sectari et exsecutiones rerum vitare brevitati concedendum est

³⁴ hinc igitur narrationem incipiemus de praefatione tantum dixisse sufficiat stultum etenim est ante historiam effluere in ipsa autem historia succingi